سەرۆکی هەرێمی کوردستان ڕەتیکردەوە لەگەڵ بەرپرسانی تاراندا باسیان لە پرسی هەڵبژاردنی پەرلەمانی کوردستان کردبێت و نابێت هەڵبژاردن ببێتە هۆی لێکترازانی زیاتری هەرێم.
ئەمڕۆ سێشەممە، نێچیرڤان بارزانی، سەرۆکی هەرێمی کوردستان لە تارانەوە کۆنگرەیەکی ڕۆژنامەوانی ئەنجامدا و تێیدا ئەو دەنگۆیانەی ڕەتکردەوە کە باس لەوە دەکەن لەگەڵ بەرپرسانی ئێراندا گفتوگۆیان لەسەر هەڵبژاردنی پەرلەمانی کوردستان کردبێت.
سەرۆکی هەرێم وتی: “جگە لەوەی کە کەی هەڵبژاردن دەکرێت، بە هیچ شێوەیەک باسی هەڵبژاردنی پەرلەمانی کوردستان نەکراوە”.
نێچیرڤان بارزانی سەبارەت بە ئەگەری دواخستنی هەڵبژاردنیش ڕایگەیاند، بەرپرسیارێتی پاراستنی بەرژەوەندی هەرێمی کوردستانە و هەر هەنگاوێکیش بنێم لەو چوارچێوەیەدا دەبێت، پێویستە هەڵبژاردنێک بکرێت هەموو لایەنەکان تێیدا بەشدار بن و نەبێتە هۆی لێکترازانی زیاتری هەرێمی کوردستان.
لە بەشێکی دیکەی کۆنگرە ڕۆژنامەوانییەکەدا جەختی لە چارەسەرکردنی کێشەی مووچە کردەوە و ڕایگەیاند، حکومەتی هەرێمی کوردستان بەشێکی زۆری پابەندییەکانی جێبەجێکردووە و نابێت چیتر مەسەلەی مووچە ببێتە هەواڵ و تێکەڵ بە کێشە سیاسییەکان بکرێت.
سەرۆکی هەرێمی کوردستان ئەوەشی خستەڕوو کە قۆناغیكی نوێیان لەگەڵ ئێران دەستپێکردووە و جەختیشیکردەوە لەوەی ڕێنادەن بەوەی هەرێمی کوردستان ببێتە سەرچاوەی هەڕەشە بۆ سەر کۆماری ئیسلامی.
