قائیمقامیەتی قەزای هەڵەبجە ڕایدەگەیەنێت، كە نابێت نرخی بوتڵێك غاز لە 8500 دینار زیاتر بێت و جەختیشدەكاتەوە، وەكیلەكان تابلۆی نوێ و لەزگەیان بە ڕەنگی سوور بۆ دەكرێت.
قائیمقامیەتی قەزای هەڵەبجە لە ڕاگەیەنراوێكدا ئاماژەی بەوەكردووە، بە فەرمانی قائیمقام و بە ئامادەبوونی سەرپەرشتیار و سەرجەم ئەندامانی لیژنەی سووتەمەنی قائیمقامیەت لە بەرواری ( 23/4/2024 ) سەردانی کارگەی غازی هەورامان کرا و لە پاش پشکنینی تەواو، کارگەی ناوبراو هیچ گرفتێکی لە ڕووی کێشی بوتڵ و بەرگری شارستانی و پاکوخاوێنی و ژینگە و کامێرای چاودێری نەبوو.
ڕاشیگەیاندووە، كە چەند تێبینییەكی بۆ دیاری کرا، کە لە ماوەی ۱٥ ڕۆژدا جێبەجێیان بکات بە پێچەوانەوە تووشی ئیجرائاتی یاسایی دەبن، كە بریتین لە:
1- سەرجەم وەکیلەکان، تابلۆ و لەزگەی نۆییان بۆ بکرێت بە ڕەنگی سور.
2- نابێت هیچ وەکیلێک غاز لە ٨٥۰۰ دینار زیاتر بفرۆشێت، کە نرخی فەرمی حکومەتە.
3- مۆڵەتی کارگە نۆی بکرێتەوە.
4- سەرجەم سەرەتاییەکانی وەکیلەکان ئاڕاستەی ب. ئاسایشی گشتی هەڵەبجە و ب. نەوت و کانزاکانی هەڵەبجە بکرێت.
