وەزیری پەروەردەی حكومەتی هەرێمی كوردستان ڕایدەگەیەنێت، پلانێک بە شێوەی پێشنیاز ئامادەکراوە بۆ قەرەبوکردنەوەی خوێندکارانی سنووری پارێزگاکانی هەڵەبجە و سلێمانی و ئیدارەکانی ڕاپەڕین و گەرمیان “سنووری بایكۆت”، بۆ ئەوەی ئەو وانانە بخوێنن، کە لەدەستیان چووە و دەشڵێت: “ماوەیەکی دیکە ئەو پێشنیازە لە ئەنجومەنی وەزیران دەخەینەڕوو”.
د. ئالان حەمە سەعید، وەزیری پەروەردەی هەرێم ڕایگەیاندووە، پرۆسەی ئەمساڵی خوێندن درێژناکرێتەوە و بە گوێرەی ئەو ساڵنامەیەی لە بەرێوەبەرایەتییەکانی پەروەردە سنوری پارێزگاکانی هەڵەبجە و سلێمانی و ئیدارەکانی ڕاپەڕین و گەرمیان دیاریکراوە کاردەکرێت.
ڕاشیگەیاندووە، پێشنیازیان بۆ بەرێوەبەرایەتیەکان کردوە وەک پشتیوانییەک و قەرەبوورکردنەوەیەکی ساڵی خوێندن و ئەو وانانەی لە دەستچوون، ئەوەش پێویستی بە پاڵپشتی داراییە، ماوەیەکی دیکە پێشنیازەکە ئاڕاستەی ئەنجوومەنی وەزیران دەکەن بە مەبەستی پەسەندکردنی.
وتیشی، “نیوە زیاتری ئەو خوێندنگایانەی لەم کابینەیە پلانیان بۆ دانراوە بنیادنراون و ئەو خوێندنگایانەی ماون هەوڵدەدەن بە گفتوگۆکردن لەگەڵ بەڵێندەرەکان و گەنجینەی پارێزگاکان بیانخەنەوە كار”.
