وەزارەتی دارایی عێراق ڕایگەیاند، بە مەبەستی گۆڕانکاری و پاڵپشتی سیاسەتی دراو وەزیری دارایی لەگەڵ سەرۆکی نوێنەرایەتی بانکی نێودەوڵەتی کۆبوونەتەوە.
ئەمڕۆ شەممە، وەزارەتی دارایی عێراق ڕاگەیەندراوێکی بڵاوکردەوە و تێیدا هاتووە، تەیف سامی وەزیری دارایی عێراق لەگەڵ جان کیوم بەرپرسی نوێنەرایەتی سندوقی دراوی نێودەوڵەتی لە عێراق کۆبووەوە، باسیان لە سیاسەتی دراو و گەشەسەندنی ئابووری، دارایی و داهاتی نەوتی و نانەوتی عێراق کردەوە.
باس لەوەش کراوە، لە درێژەی کۆبوونەوەکاندا تەیف سامی، وەزیری دارایی عێراق سەبارەت بە میکانیزمی گۆڕانکاری لە سیاسەتی دراوی عێراق لەگەڵ جیهاد ئازۆر بەڕێوەبەری بەشی ڕۆژهەڵاتی ناوەڕاست و ئاسیا لە بانکی نێودەوڵەتی کۆبووەوە، جەختی لە هەبوونی ناوەندی گەشەی دارایی عێراق کردووەتەوە لە بانکی نێودەوڵەتی کە بە هۆیەوە سەرپەرشتی گەشەی ئابووری عێراق دەکرێت.
