کەشناسی: شەپۆلێکی بارانبارین لەگەڵ هەورە تریشقە دەستپێدەکات

کەشناسی پێشبینی دەکات ئەمڕۆ و سبەینێ شەپۆلێکی بارانبارین هەرێمی کوردستان بگرێتەوە کە هەورە تریشقەشی لەگەڵ دەبێت، ئەوەشی خستەڕوو کە پلەی گەرما دادەبەزێت.

بەڕێوەبەرایەتی گشتی کەشناسی و بوومەلەرزەزانی هەرێمی کوردستان ڕایگەیاند، ئەمڕۆ یەکشەممە، لە ئەنجامى کاریگەرى نزمە پاڵەپەستۆى دەریاى سوور ناوچەکەمان دەکەوێتە ژێر کاریگەرى شەپۆلێکى بارانبارین.

ڕوونیشیکردەوە کە ئاسمانى سەنتەرى پارێزگاکان و ناوچە شاخاویییەکان و تەواوى ناوچە جیاجیاکان هەورى تەواو دەبێت لەگەڵ باران بارین و هاتنى شەپۆلێکى هەورە تریشقە.

ڕاشیگەیاند، بڕى دابارین لەسەرجەمى ناوچەکەمان مامناوەند دەبێت لە نێوان (5-10) ملم لە سەنتەرى پارێزگاکان و وە (8-15)ملم لە ناوچە شاخاوییەکان و ناوچە سنووریەکان.

کەشناسی ئەوەشی خستەڕوو کە ئەمڕۆ پێشبینى زیاد بوونى خێراىی با بۆ سەرووى 25کم لە کاتژمێرێکدا و بەهۆى ناجێگیرى کەشوهەواشەوە ئەگەرى لێزمە بارانى لەناکاو هەیە.

سەبارەت بە سبەینێش ڕایگەیاند بارانبارین بەردەوامى دەبێت بە تایبەت لە کاتەکانى بەرەبەیان لە سنوورى پارێزگاى دهۆک و بەشێک لە ناوچە شاخاوییەکانى باکوورى ڕۆژئاواى پارێزگاى هەولێر.

ئاماژەشیدا بەوەی بڕى بارانی پێشبینیکراو لە نێوان (8-14) ملم دەبێت و لە کاتى لێزمە باران و هەورە تریشقەدا ئەم بڕە دەگۆڕێت بۆ سەرووى 15 ملم.

بەڕێووەبەرایەتی کەشناسی ڕوونیکردەوە کە لە دواى نیوەڕۆوە کاریگەرى ئەم باران بارینە درێژدەبێتەوە بۆ سەر سنوورى ئیدارەى سەربەخۆى ڕاپەڕین و سنوورى پاڕیزگاى سلێمانى و هەڵەبجەو پاشان بۆ سەر سنوورى ئیدارەى گەرمیان و بەشێک لە پارێزگاى کەرکووک.

ڕاشیگەیاند لە ئێوارەى دووشەممەوە تا ڕادەیەک بارانبارین کەم دەبێتەوە زیاتر ئاسمان هەور و نیمچە هەور دەبێت.

ئەوەشی خستەڕوو کە ئەمڕۆ و سبەینێ پلەی گەرما 4-7 پلە دادەبەزێت.

بەرزترین پلەکانی گەرمای پێشبینیکراو بە پلەی سیلیزی بۆ سبەى

هەولێر : 22

سلێمانی:  20

دهۆک: 19

زاخۆ:  23

هەڵەبجە : 23

کەرکووک : 25

سۆران : 20

حاجی ئۆمەران : 12

گەرمیان : 26