شارەزایەکی کەشناسی پێشبینییەکانی کەشوهەوای بۆ ڕۆژانی ئایندە ڕاگەیاند، لە درەنگانی ئەمشەوەوە نمەباران دەبارێت و هەورەبروسکە چالاک دەبێت.
ئاراس جەبار، شارەزای کەشناسی ڕایگەیاند، لە درەنگانی ئەمشە و بە دواوە ناوچەکانمان دەکەوێتەوە ژێر کاریگەری نزمەپاڵەپەستۆیەل لە دەریای سوور و ناوەڕاستەوە، سەرەتاش بە چالاکبوونی ھەورە بروسکە و نمە بارانی کورت خایان کاریگەری دەبێت.
ئاماژەی بەوەکرد، سبەینێ یەکشەممە ئاسمانی ھەرێمی کوردستان بە زۆری نیمچە ھەور بۆ ھەوری تەواو ئەبێت و بای باشووری ڕۆژھەڵات لە ناوچەکانی باشووری عێراقەوە بۆ سەر ناوچەکانمان چالاک دەبێت بە خێرای 15 تا 30 کیلۆمەتر لە کاتژمێریکدا.
وتیشی، لە ناوچەکانی سنووری ئیدارەی گەرمیان و پارێزگای کەرکووک خێرای باکە چالاکتر دەبێت، ھەندێک کات بۆ سەرووی 40 کیلۆمەتر لە کاتژمێرێکدا، بەھۆیەوە ئەگەری بەرزبوونەوەی تۆز و خۆڵێکی کەم دەبێت، لە کاتەکانی سبەی ئێوارەوە بە تایبەت شەو کاریگەری نزمەپاڵەپەستۆکەی دەریای سوور لەسەر ناوچەکانمان چالاکتر دەبێت و بەگوێرەی کات ھەورە بروسکە دەستپێدەکات، تاوە بارانی مامناوەند بۆ بەخوڕ لە شوێن و ناوچەی جیاجیادا دەبارێت کە ڕێژەی دابارینەکان ناجێگیر دەبن، لە شوێن تا شوێن کاریگەری جیاواز و دیاری نەکراو دەبێت، پلەی گەرمی سبەی بەراورد بە ئەمڕۆ 2 تا 4 پلە نزمدەبێتەوە .
ئاراس جەبار، ئەوەشی خستەڕوو، تاوە بارانی بەھارە و ھەورە بروسکە لەم قۆناغەدا تا ئێوارەی دووشەممە بەردەوامی دەبێت و قۆناغی دووھەم لە ئێوارەی سێشەممەوە دەستپێدەکاتەوە لەم قۆناغەدا پێشبینی بارانێکی باشتر دەکرێت لەگەڵ نزمبوونەوەی زیاتری پلەی گەرمی.
بەرزترین پلەی گەرمی پێشبینیکراوی سبەینێ:
ھەولێر 25 پلە
سلێمانی 24 پلە
دھۆک 22 پلە
ھەڵەبجە 25 پلە
کەرکوک 28 پلە
ئیدارەی گەرمیان 31 پلە
ئیدارەی راپەرین 24 پلە
ئیدارەی سۆران 22 پلە
