بەڕێوەبەرایەتی ئەوقافی هەولێر ئاشكرای دەكات، كە شەوی ڕابردوو هێرش كراوەتە سەر مامۆستای مزگەوتی (گڵۆباڵ سیتی) و دەشڵێت: “ڕێكاری یاساییمان گرتۆتەبەر”.
بەڕێوەبەرایەتی ئەوقاف و کاروباری ئاینی ھەولێر لە ڕاگەیەنراوێكدا ئاماژەی بەوەكردووە، شەوی ڕابردوو لەکاتی جێبەجبکردنی ئەرکی ئاینی و خزمەتکردنی ڕۆژوەوانان، لەلایەن کەسێکەوە بە ناڕەوا دوور لە ئادابی ئاینی و کۆمەڵایەتی ھێرش کراوەتە سەر مامۆستای (مزگەوتی گڵوباڵ سیتی).
ڕاشیگەیاندووە، ئێمە لەبەڕێوەبەرایەتی ئەوقاف وکاروباری ئاینی ھەولێر، وێڕای بەتوندی ئیدانەکردنی ئەم ڕوداوە ڕاستەوخۆ ڕێکاری یاساییمان لەگەڵ دەزگا پەیوەندیارەکان گرتەبەر و ھەماھەنگ بووین تاوەكو تۆمەتبار دەستگیرکرا.
جەختیشی كردۆتەوە، ھەموو لایەک ئاگادار دەکەینەوە کە دامەزراوەکانی ئەوقاف داکۆکیکار و بەریگریکار و پارێزەری ڕاستەقینەی مامۆستایانن و بەدواداچووینش بۆ ئەم ڕوداوە دەکەین تاکو یاسا ڕێڕەوی خۆی بەتەواوی وەردەگرێت .
