چاوەڕوان دەکرێت لە کۆبوونەوەی ئەمڕۆی ئەنجومەنی وەزیراندا بڕیار لەسەر دابەشکردنی مووچە بدرێت و دوابەدوای ئەوەش دەوام لە سنووری ئیدارەی سلێمانی ئاسایی بێتەوە.
ماوەی دوو هەفتەیە کارمەندانی بەڕێوەبەرایەتی هاتووچۆی سلێمانی بە هۆی دابەشنەکردنی مووچەوە بایکۆتی دەوامیان ڕاگەیاندووە و دوای ئەوانیش ژمارەیەکی دیکەی بەڕێوەبەرایەتی و فەرمانگەکانی پارێزگاکانی سلێمانی و هەڵەبجە و هەردوو ئیدارەی گەرمیان و ڕاپەڕین دەستیان بە بایکۆت کرد.
لە پێشنیوەڕۆی ئەمڕۆشەوە، ئەنجومەنی وەزیران لە کۆبوونەوەیەدایە و فەرمانبەران چاوەڕێی ڕاگەیاندنی دابەشکردنی مووچەی مانگی شوبات و ئاداری لێ دەکەن.
لە لایەکی دیکەشەوە تریفە محەمەد، بەڕێوەبەرى پەروەردەى رۆژهەڵاتى سلێمانى بە میدیای یەکێتی ڕاگەیاند، لەگەڵ سەرجەم ئەو بەڕێوەبەرانە لە پەیوەندیداین و ئەگەر ئەمڕۆ لیستى مووچە رابگەیەندرێت، هەفتەى داهاتوو پرۆسەى خوێندن ئاسایی دەبێتەوە.
بەڕێوەبەرایەتی هاتووچۆی سلێمانیش ڕایگەیاند، لە یەکشەممەی داهاتووەوە دەست بە دەوام دەکەنەوە.
