سەرەڕای ڕاگەیاندنی پشووی فەرمی لەلایەن حكومەتی هەرێم بۆ ماوەی هەفتەیەك بەبۆنەی سەری ساڵی نوێوە، لە چەند فەرمانگە و نەخۆشخانەیەك دەوام بەردەوامە.
بەڕێوەبەرایەتی تەندروستی دەربەندیخان لە ڕاگەیەنراوێكدا ئاماژەی بەوەكردووە، سەرەڕای پشووی فەرمی، پزیشکان و کارمەندانمان بەردەوامن لە ناوەندە تەندروستیەکان لە خزمەتکردنی هاووڵاتیان بەشێوەی ئێشکگری.
ڕوونیشی كردۆتەوە، لە نەخۆشخانەی گشتی شەهید تۆفیق بەشی فریاكەوتن ٢٤ کاتژمێر پزیشکان و کارمەندانمان لەپێشوازی چارەخوازاندا کراوەیە بۆ هەر حاڵەتێکی نەخوازراو و لە مەڵبەندی تەندروستی ئێشكگری شەهید حەمید پزیشک و کارمەندان بەشێوەی ئێشکگر لەپێشوازی نەخۆشدا ئەبن لەکاتژمێر ٨:٣٠ی بەیانی بۆ کاتژمێر ١٢:٠٠ی شەو.
ڕوونیشی كردۆتەوە، دەرمانخانەی نەخۆشیە درێژخایەنەکان بەیانیان کراوەیە دەتوانن سەردان بکەن.
ئەمەش لەكاتێكدایە، كە نەخۆشخانەی هیوا لەپێناو نەخۆشان و چارەسەری هاووڵاتیان بڕیاریدا بە هەڵوەشاندنەوەی پشووی سەری ساڵ و لەو ڕۆژانەدا دەوام دەكەن.
