جێگری بەڕێوەبەری گشتی باج و خانووبەرەی میری ڕایدەگەیەنێت، وەك چۆن لەداهاتی فرۆشتنی نەوتی بەسڕا و كەركوك پارەی مووچە و خزمەتگوزاری بۆ تەواوی پارێزگاكان تەرخان دەكرێت، پێویستە سەرجەم داهاتە نەوتی و نانەوتیەكانی هەرێم كۆبكرێنەوە و بەشێكی بۆ مووچە تەرخان بكرێت و بەشێكی تریش بۆ خزمەتگوزاری.
عەلی عەبدولرەحمان، جێگری بەڕێوەبەری گشتی باج و خانووبەرەی میری بە(خەڵك)ی ڕاگەیاند، تاوەكو ساڵی ٢٠١٤ ئەو كاتەی بوودجە لەبەغداد دەهات مووچە لەسەر داهاتی فرۆشتنی نەوتی بەسڕا و كەركوك دەدرا بەبێ هیچ كێشەیەك، چونكە بەشێكی پارەكە بۆ مووچەی هەموو عیراق بەهەرێمی كوردستانیشەوە دابین دەكرا، بەڵام دوای نەناردنی بوودجە بۆ هەرێمی كوردستان بەپێی ڕێككەوتنی هەولێر و سلێمانی لەسەر بنچینەی ٤٧٪ بە ٥٣٪ لەفرۆشتنی نەوتی هەرێم و داهاتی ناوخۆ بەكاربهێنن.
وتیشی، “هەندێك جار لەسلێمانی تووشی كەمی نەختینە دەبووینەوە، چونكە داهاتی سلێمانی بەراورد بەهەولێر كە زۆرترین چالاكی كۆمپانیاكانی تێدایە و دهۆك بەهۆی گومركی ئیبراهیم خەلیل، كە توركیا بەعیراق دەبەستێتەوە ڕەنگە كەمتر بێت لەچاو گومركی باشماخ و پەروێزخان، بۆیە هەندێك جار گرفت بۆ مووچە درووست بووە.
دەشڵێت: “بەداخەوە ئەگەر عەقڵیەتێك هەبێت پێی وابێت تەواوی داهاتی ئیبراهیم خەلیل بۆ دهۆك خەرج بكرێت، كە لەهیچ حوكمڕانیەك وانیە، چونكە لەعیراق لەسەر نەوتی بەسڕا و كەركوك مووچە و بوودجە بۆ هەموو پارێزگاكان تەرخان دەكرا ئەگەر نەوتیشی نەبێت، بۆیە ئەگەر حوكمڕانی تەندروست دەكەین تەواوی داهاتی نەوتی و نانەوتی دەبێ لەوەزارەتی دارایی كۆبكرێتەوە”.
ئەوەشی خستەڕوو، لەكاتی كۆكردنەوەی داهات بەشێكی بۆ مووچە تەرخان دەكرێت و بەشێكی تریش بۆ خزمەتگوزرای بەتایبەت بۆ ئەو ناوچانەی پێویستیان زیاترە خەرج بكرێت.
