بەڕێوەبەرایەتی گشتی کارەبای سلێمانی نرخی کارەبای ستییەکانی بۆ ئەم مانگە دیاریکرد و ڕایگەیاند، نرخی هەر کیلۆواتێک بریتییە لە 252 دینار، کە بەراورد بە مانگی ڕابردوو دابەزیوە.
ئەمڕۆ سێشەممە، لیژنەی باڵای دیاریکردنی نرخی کارەباى کۆمەڵگاکانى نیشتەجێبوون (ستییەکان) کۆبوونەوەیەکی سازکرد و تیایدا نرخی کیلۆواتی کارەبای موەلیدەی بۆ مانگی ئازار دیاریکرد، کە بریتیە لە 252 دینار بۆ هەر کیلۆواتێک.
بەڕێوەبەرایەتی گشتی کارەبای سلێمانیئاماژەی بەوەکرد، بەگوێرەی نرخی گازوایل لە بازاڕ و ئەو توێژینەوەیەی بۆ خەرجی موەلیدەی ستییەکان ئامادەکراوە نرخی کیلۆوات ئاوەڕێک کارەباى موەلیدەى ستییەکان بۆ ئەم مانگە (ئازار) بریتییە لە (252) دینار.
ئەوەشی خستەڕوو، جێى ئاماژە بۆکردنە مانگى 2 (شوبات) نرخى کیلۆواتێک کارەباى موەلیدەى ستییەکان (254) دینار بوو، ئەوەش واتە نرخى کیلۆواتێک 2 دینار دابەزیوە.
جەختی لەوەشکردەوە، پێویستیشە سەرجەم ستیيەکانی سنووری پارێزگای سلێمانی پابەندبن بە نرخەکەوە، بە پێچەوانەوە ئەگەر زیاتر لەو نرخە وەربگرن ڕووبەڕووی ڕێکاری یاسایی دەکرێنەوە.
