ژوورى ئۆپەراسیۆن و بەرێوەبردنى قەیران و کارەسات ڕایگەیاند، لە لافاوەکەی پارێزگای دهۆک، سێ کەس گیانیان لەدەستداوە، 11 کەس برینداربوون و 120 کەسیش ڕزگارکراون.
ژوورى ئۆپەراسیۆن و بەرێوەبردنى قەیران و کارەسات لە هەرێمی کوردستان، دوایین ئاماری لافاوەکەی 36 کاتژمێری ڕابردووی پارێزگای دهۆکی بڵاوکردەوە و ڕایگەیاند، تا ئێستا سێ کەس گیانیان لەدەستداوە، 11 کەس بریندارن، 120 کەس رزگارکراون، 627 کەس لە هۆتێل و مۆتێلەکان نیشتەجێکراون و 160 خانوو لەگەڵ 50 ئۆتۆمبێل زیانیان پێگەیشتووە.
ئەمەش لە کاتێکدایە، لە ڕۆژی دووشەممەوە، شەپۆلێکی بارانبارینی بەهێز هەرێمی کوردستانی گرتووەتەوە و تاوەکو ئێستاش بەردەوامە، بەپێی ئامارەکانی بەرێوەبەرایەتیی کەشناسی و بوومەلەرزەزانی پارێزگای دهۆک لە کاتژمێر 9ی بەیانی دوێنێ سێشەممەوە تاوەکو 9ی شەو، لە شاری دهۆک 133 ملیمەتر بارانباریوە.
