وەزارەتی دارایی عێراق زیاتر لە ملیارێک و 500 ملیۆنی دیکەی بۆ هەرێمی کوردستان ڕەوانە کرد، بەڵام تا ئێستا بڕیاری دابەشکردنی مووچەی فەرمانبەران نەدراوە.
ئەمڕۆ سێشەممە، وەزارەتی دارایی عێراق بڕی ملیارێک و 503 ملیۆن دیناری دیکەی مووچەی فەرمانبەرانی خستە سەر هەژماری بانکی وەزارەتی دارایی هەرێمی کوردستان.
پێشتر حکومەتی هەرێمی کوردستان داوای 37 ملیار دیناری دیکەی لە بەغدا کردبوو بۆ مووچە و تا ئێستاش دیار نییە کەی مووچە دابەش دەکرێت.
هەفتەی ڕابردوو ئەنجومەنی وەزیرانی هەرێمی کوردستان بڕیاری دا ئەو پارەیە دابەش نەکات کە بەغدا بۆ دابەشکردنی مووچەی مانگی شوبات ڕەوانەی کردووە.
لە سەرەتای ئەم هەفتەیەوە ژمارەیەک بەڕێوەبەرایەتی و فەرمانگەی سنووری پارێزگای سلێمانی و ئیدارەی ڕاپەڕین بە هۆی دابەشنەکردنی مووچەوە بایکۆتیان ڕاگەیاندووە.
