بریکاری وەزارەتی دارایی عێراق لە ساڵیادی کیمیابارانکردنی هەڵەبجەدا پەیامێکی بڵاوکردەوە و ڕایگەیاند، “ئەرکی حکومەتی فیدراڵییە ھەڵەبجە و گشت زیانەکانی جینۆسایدی کوردستان قەرەبوو بکاتەوە”.
مەسعود حەیدەر، بریکاری وەزارەتی دارایی عێراق لە ٣٦هەمین ساڵیادی کیمیاباران کردنی هەڵەبجەدا پەیامێکی بڵاوکردەوە و ڕایگەیاند، ھەڵەبجە ھەموو پێکھاتکانی عێراق کۆدەکاتەوە بۆ ڕەتکردنەوەی زوڵم و جینۆسایدکردن، دووپاتکردنەوەی ئارەزوویان بۆ ئاشتی و پێکەوەژیان.
لە بەشێکی دیکەی پەیامەکەیدا هاتووە، ئەرکی یاسایی و مۆراڵی حکومەتی فیدراڵییە ھەڵەبجە و گشت زیانەکانی جینۆسایدی کوردستان قەرەبوو بکاتەوە، جینۆسایدی ھەڵەبجە زیاتر ھاندەرمانە بۆ بەرگریکردن لە مافەکانی گەلی کوردستان و ھەموو پێکھاتەکانی عێراق بۆ بوونیادنانی دەوڵەتێکی مەدەنی کە تێیدا رێز لە دەستوور، یاسا و بنەماکانی شەراکەت و ھاوسەنگی و تەوافق سیستمی فیدراڵی دەوڵەت بگیرێت، دەوڵەتێک کە تێیدا شۆفێنیزم، ڕەگەزپەرستی و تایفەگەری قێزەوەن و قبوڵنەکراو بێت.
