جیان دۆمێنیکۆ پیکۆ، دیپلۆماتكارێكی ئیتاڵی له نه‌ته‌وه یه‌كگرتووه‌كان، كه ڕۆڵی ناوبژیوانی بینی لە ڕاگرتنی جه‌نگی تاقەتپڕوكێنی 8 ساڵەی نێوان عێراق و ئێران، بە نه‌خۆشی کۆچی دوایی کرد.
بەپێی هەواڵی میدیاكان، جیان دۆمێنیکۆ پیکۆ، دیپلۆماتکاری پێشووتری نەتەوە یەکگرتووەکان، کە ڕۆڵی دیاری لە ڕاگرتن و كۆتایی هێنان بە جه‌نگی عێراق و ئێران بینی، لە تەمەنی 75 ساڵیدا کۆچی دوایی کرد.
جیان پیکۆ لە ساڵی 1973 تاكو 1992 لە نەتەوە یەکگرتووەکان کاری دیپلۆماسی کردووە و لە ساڵی 1982 بووەتە بەرپرسی ئۆفیسی خاڤیێر پێرێز دی کوێلار، سکرتێری پێشووتری گشتی نه‌ته‌وه یه‌كگرتووه‌كان و پاشان بووه‌ته یاریدەدەری بۆ کاروباری سیاسی.
جه‌نگی 8 ساڵه‌ی نێوان عێراق و ئێران، كه به جه‌نگی یه‌كه‌می كه‌نداو ناوده‌برێت له ئه‌یلوولی 1980 هه‌ڵگیرسا و له 8ـی ئابی 1988ـدا كۆتایی پێهات. ئه‌م جه‌نگه بووە هۆی گیانلەدەستدانی زیاتر لە ملیۆنێک کەس لە هەردوولا و هه‌زاران سه‌ربازیش له‌نێوانیان به دیل گیران و هه‌زارانیش بێسه‌روشوێن بوون.
