سبەینێ یەكەم ڕۆژی مانگی ڕەمەزانی پیرۆزی ئەمساڵە و لە ئەمشەوەوە موسڵمانان هەڵدەستن بۆ پارشێو (سحور) و پسپۆڕی گیادەرمان و مامۆستای زانکۆ دەڵێت: ھەوڵبدەن باشترین و تەندروستترین خواردن بخۆن لە (پارشێۆ) چونکە ڕۆژێکی درێژی ژیانت لە پێشە.
د. بەدر قادر سورچی، پسپۆڕی گیادەرمان و مامۆستای زانکۆ چەند ڕێنماییەك دەداتە هاووڵاتیان و ڕایدەگەیەنێت، لە پارشێودا خواردنەکان بەپێی جۆری کارکردنەکەت بخۆ ئەگەر ماندووی زیاتر بخۆ و ئەگەر تەنھا کارێکی سادەت ھەیە کەم بخۆ بۆ ئەوەی کێشت زیاد نەبێت.
د. بەدر دەڵێت: خواردنەکان بە ئارەزووی خۆت ھەڵیانبژێرە، كە ئەمانە گرنگترینیانن:
– ئاو خواردنەوە و چایەک بخۆ با (ھێل و دارچین یان گوڵەباخ یان بەیبون، شاریحانە)ی تێدابێت تا ژانەسەر نەگری.
– خورما و تەحین یان ڕاشی ( کونجی) و گوێز و چەرەزاتی نەبرژاو و ھەنگوین، ماست، هێلکه‌ی کوڵاو، په‌نیر، نیسک، نۆکاو، لۆبیای کوڵاو.
– کەمێک شۆفان و ماست یان گلاسێک شیر بەهێزە و قەڵەویشت ناکات.
– نانی خۆمانە ساجی (گەنم و جۆ) بخۆ.
– ئەگەر کارەکەت قورسە دەتوانی برنج یان شۆربای برنج یان مەعکرۆنە بێ چەوری و پەتاتەی کولاو یان نیسک و نۆک و لۆبیا و ماش بخۆیت.
– بە ئارەزووی خۆت خورما و مۆز و فراولە و شوتی و سێو و خەیار و تەماتە و سپێناخ و خاس و زه‌یتوون بخۆن.
دەشڵێت: پێویستە ئەم خواردن و خواردنەوانە نەخورێن لە پارشێودا:
– خواردنی قورس، سوورکراوە، چەوری، گۆشتی سوور، فاست فود.
– ترشیات، خواردنی سوێر، تیژ، ترش.
– خواردنی پاقلاوە، شیرینی دەستکرد، خواردنەوە گازییەکان.
بە وتەی ئەو پسپۆڕە گیادەرمانییە، هه‌ڵه‌کانی پارشێو ئەمانەن:
– پارشێو نه‌کردن هەڵەیە و چه‌ند بتوانرێت دره‌نگتر بخورێت پێش بانگی به‌یانی.
– خواردنی بڕێکی زۆر خۆراک به تایبه‌ت خۆراکی چه‌ور و شیرینی و سوێر.
– خواردنه‌وه‌ی بڕێکی زۆر ئاو و شله‌مه‌نی به مه‌به‌ستی ئه‌وه‌ی تینووت نه‌بێت له ڕۆژه‌که‌دا.
د. بەدر زیانە تەندروستییەکانی پارشێو نەکردن ڕوون دەكاتەوە، كە ئەمانەن:
– زیاد بوونی هەستی برسیەتی، کە دەبێتە هۆی بڕێکی زۆر زیاتر لە خواردن بخورێت لە بەربانگدا.
– وشک بوونەوەی جەستە و تێکچوونی ئاستی کانزاکان و سەرئێشە و زیاد بوونی تینوویەتی.
– قەبزی و ئاوسانی ناو سک و غازات.
– دابەزینی ئاستی شەکرەی خوێن و بێهێزی وشەکەتی و هیلاکی لە ڕۆژدا.
