بەڕێوەبەرایەتی پەروەردەی هەولێر ئاگاداری مامۆستایان و فەرمانبەران دەكاتەوە، كە فۆڕمی تایبەت بە مووچە پڕبكەنەوە و ڕایدەگەیەنێت، بەڕێوەبەری خوێندنگەكان سەردانی ژمێریاری بكەن بۆ وەرگرتنی فۆڕمەكە.
بەڕێوەبەرایەتیی پەروەردەی ناوەندیی هەولێر لە ئاگادارییەكدا ئاماژەی بەوەكردووە، “بەڕێوەبەری سەرجەم قوتابخانەکانی سنووری بەڕێوەبەرایەتیی پەروەردەی ناوەندیی هەولێر، بەیانی کاتژمێر 9 بە پەلە سەردانی دیوانی پەروەردە، بەشی ژمێریاری و فەرمانبەری ڕێکخەری مووچە بکەن”.
ڕاشیگەیاندووە، فۆڕمێکی تایبەت بە چەند زانیارییەکی داواکراو بۆ مووچە دەدرێتە هەموو قوتابخانەكان و پێویستە هەمان ڕۆژ بیگەڕێننەوە بۆ دیوانی پەروەردە.
پڕكردنەوەی ئەو فۆڕمە بۆ نووسینی ناوی چواری فەرمانبەران و مامۆستایانە لەگەڵ ناونیشانی وەزیفی و كۆدی بێهاوتا و جۆری دەرماڵە.
بەپێی زانیارییەكانی (خەڵك) كە لە سەرچاوەیەكەوە دەستی كەوتووە، لە چەند ڕۆژی ڕابردووشدا لە بەشێكی بنكە تەندروستییەكان لەلایەن ژمێریارییەوە داوای ناوی چواری و كۆدی بایۆمەتری و كارتی نیشتمانی لە فەرمانبەران و كارمەندانی تەندروستی كراوە بۆ وردبینی كردنەوە لە لیستی مووچەدا.
