قائیمقامیەتی سلێمانی بڵاویکردەوە، لیژنە هاوبەشەکان بڕی 806 کیلۆگرام گۆشتی لەناو برد کە لە بەڕادێکدا لە بازاڕی سەعید تەها کۆیی بە بەستووی هەڵگیرابوو و خاوەنەکەی بە گۆشتی فرێش دەیفرۆشت بە خواردنگە و لەفە فرۆشەکان.
دکتۆر ژیار بەهادین، نوێنەری ڤێتێرنەری لە لیژنە هاوبەشەکانی قائیمقامیەتی سلێمانی لەوبارەیەوە ڕایگەیاند، سەرەڕای ئەوەی کە بەڕادەکە مۆڵەتی نەبووە، لەکاتی سەردانی لیژنەکانمان دەرکەوتووە کە بڕێکی زۆر گۆشتی وردکراوی تێدایە و بەستوویەتی و سەرچاوەکەی ئاشکرا نییە، بەڵام دەکرێت بە قیمە و بە گۆشتی فرێش دەفرۆشرێت بە خواردنگە و لەفە فرۆشەکان.
ئاماژەی بەوەشکرد، هەر گۆشتێک چووە حاڵەتی بەستنەوە ناکرێت بە فرێش بفرۆشرێت، هەربۆیە تەواوی گۆشتەکە لەناودەبرێت و رێکاری یاسایی لەگەڵ خاوەنەکەی دەگیرێتەبەر.
قائیمقامیەتی سلێمانی دوای لە هاووڵاتیانیش کرد بەهیچ جۆرێک قیمەی ئامادەکراو نەکڕن، بەڵکو پێویستە بە ئامادەبوونی خۆیان گۆشتەکە بکرێت بە قیمە.
