سەرۆکی ئەنجوومەنی راژەی فیدراڵی ڕایگەیاند، لە ناوەراستی ئەم مانگەدا، فۆڕمی دامەزراندنی تایبەت بە هەڵگرانی بڕوانامە باڵا و یەکەمەکان بڵاودەکەنەوە.
ئەنجوومەنی باڵای ڕاژەی فیدراڵی بڵاویکردەوە، کۆبوونەوەیەکی هاوبەش ئەنجامدراوە، لە نێوان مەحمود تەمیمی، سەرۆکی ئەنجوومەنی گشتی راژە و شاندی لیژنەى پلاندانانی ستراتیجی و خزمەتی فیدراڵی، بە مەبەستی تاوتوێکردنی دواپەرەسەندنەکانی دۆسیەی دامەزراندنی هەڵگرانی بڕوانامە باڵاکان و یەکەمەکان.
هاوکات بەگوێرەی ڕاگەیەندراوەکە، لە دوو ڕۆژی داهاتوودا، ئەنجامی بەرایی هەڵسەنگاندنی ئەو کەسانە ئاشکرا دەکرێت، کە شیاون بۆ قۆناغی تاقیکردنەوەکان.
سەبارەت بە دامەزراندنی کەسانی خاوەن بڕوانامەی باڵا و یەکەمەکانیش، لە ناوەڕاستی ئەم مانگەدا، فۆڕمی تایبەت بە دامەزراندنی ئەو کەسانە بڵاودەکرێتەوە.
لە کۆتایی ساڵی رابروودا، دەزگای دژەتیرۆری عێراق، هەلی دامەزراندنی ڕاگەیاند، بەڵام بەهۆی زۆری ڕێژەی بێکاریی و کەمی هەلی دامەزراندنەوە، لە چەند کاتژمێرێکدا، زیاتر لە 8 ملیۆن کەس ناوی خۆیان لە فۆڕمی دامەزراندنەکە تۆمارکرد.
