سبەینێ دابەشکردنی ئاو لە سلێمانی دەستپێدەکاتەوە

بەڕێوەبەرایەتی ئاوی سلێمانی رایگەیاند، دوای شکانی بۆری ئاوی دوکان -سلێمانی بۆ ماوەی زیاتر لە ٧٢ کاتژمێر بەهۆی بارانبارینەوە سبەینێ دابەشکردنی ئاو دەستپێدەکاتەوە.

بەڕێوەبەرایەتییەکە لە راگەیەندراوێکدا بڵاویکردووەتەوە، بەهۆی ئەو شەپۆلە بارانبارینەی ماوەی چەند رۆژی ڕابردوو شاری سلێمانی گرتەوە و چەندجارێک ىرانی کارەبا لە پڕۆژەی ئاوی دوکان سلێمانی ڕوویداو گرفت بۆ دابەشکردنی ئاوی هاووڵاتییانی شاری سلێمانی و قەزاو ناحیەکانی دەوروبەری درووست بوو، بووە هۆی شکانی بۆرییەکە.

دەشڵێت:” تیمەکانی هێڵی دوو بەبەردەوامی لە ماوەی ۷۲ کاتژمێری کارکردنی بەردەوامی شەو و ڕۆژی بێ دابڕان توانرا بە هەوڵی هەموولایەک بۆرییەکە چاکبکرێتەوە، بۆیە بەیانی ئاو دەگاتەوە شاری سلێمانی و دەست بەدابەشکردنی ئاو دەکرێتەوە بۆ گەڕەکەکانی شاری سلێمانی بە تایبەت گەڕەکەکانی ناوچەی قڕگە و فەرمانبەران و سەروەری و کوردسات و ئەو گەڕەکەنەی کە تووشی کەم ئاوی بوون لەم چەند ڕۆژەی ڕابردوو”