بەڕێوەبەرایەتی هاتووچۆی سلێمانی بڵاویکردەوە، لە کەشوهەوای بەفرباریندا شۆفێری کردن بۆ دوو هێندە قورس دەبێت، بۆیە لەسەر شۆفێر پێویستە کە بۆ سەلامەتی خۆی و کەسانی دەوروبەری پابەندی ڕێنماییەکان ببێت.
ڕێنماییەکانی شۆفێریکردن لە بەفردا:
1-کەمکردنەوەی خێرایی بۆ ڕادەیەک کە توانای وەستاندنەوەی ئۆتۆمبیلەکەت هەبێت واتە لە ناو شارەکان خێرایی لە 30 بۆ 50 کیلۆمەترر کاتژمێرێک و نابێت زیاتر بێت، هەروەها بۆ دەرەوەی شارەکان لە 60 کیلۆمەتر یان کەمتر بە گوێرەی بارودۆخی شەقامەکە خێرایی کەم و زیاد دەکەیت.
2- پاراستنی ماوەی سەلامەتی لەنێوان ئۆتۆمبیلەکەی خۆت و ئوتومبیلی بەردەمت، ئەم خاڵە گرنگییەکی زۆری هەیە، چونکە توانای وەستاندنەوەی ئۆتۆمبیل لە بەفر باریندا کەم دەکات، بۆیە پێویستە ماوەیەکی دیاریکراوت هەبێت بۆ وەستاندنەوەی ئوتومبیل.
3- ئیشکردنی ڕووناککەرەوە (گڵۆپ)ی نزم و ڕووناککەرەوەی تەم گرنگییەکی زۆری هەیە، چونکە بارینی بەفرو بوونی تەم ڕێژەی بینین کەم دەکاتەوە.
4- دڵنیابوون لەوەی کە ئۆتۆمبیلەکەت کەم و کوڕی نییە، پێویستە بانزینی تەواو لە ئۆتۆمبیلەکەتدا بێت بۆ کاتی پێویست و قەرەباڵغی.
5-بوونی بەتانییەک لە ناو ئۆتۆمبیلەکەت بۆ کاتی پێویست.
6- نابێت شۆفێر بە شپرزەیی و لەناکاو ئیستۆپ بگرێت بەڵک و بەنەرمی و لەسەرخۆیی.
7- سەردان نەکردنی ناوچە شاخاوییەکان بەهیچ شێوەیەک بەمەبەستی گەشت و بەسەربردنی کات.
8- لەکاتی بوونی حاڵەتی نەخوازراو ڕاستەوخۆ پەیوەندی بکرێت بەلایەنە پەیوەندیدارەکان.
هاتوچۆ 188
پۆلیسی فریاکەوتن 104
فریاگوزاری تەندروستی 122
بەرگری شارستانی 115
