سێ ڕۆژی دیکە ئەو ماوەیە تەواو دەبێت کە حکومەتی هەرێمی کوردستان بۆ لێخۆشبوونی ڕێژەی ٢٠٪ی قەرز و سزاکانی هاتوچۆ دیاری کردووە و حکومەتیش دەڵێت سزادانی دارایی یەکێکە لە ڕێگەکانی کەمکردنەوەى ڕووداوەکانی هاتوچۆ و پاراستنی گیان و سامانی هاووڵاتییان.
ئەمڕۆ یەکشەممە، فەرمانگەی میدیا و زانیاری حکومەتی هەرێم ڕاگەیاند، بڕیارى لێخۆشبوونی ٢٠%ـى قەرز و پێبژاردنی سزاکانی هاتوچۆی هاووڵاتییان، تاکوو ڕۆژی چوارشەممە، ٢٨ی شوباتی ٢٠٢٤ بەردەوام دەبێت.
بڕیاری لێخۆشبوون، لە ڕۆژی ٢٨ ى ٨ ى ٢٠٢٣ بەرکار بووە و دواتریش تاکوو ٢٨ ى ٢ ى ٢٠٢٤، درێژ کرایەوە، ئەمەش وەکوو هاوکارییەکی هاووڵاتییان و هاندانیان بۆ پاکتاوکردنی قەرز و پێبژاردنەکانیان.
بە پێی زانیارییەکانی ڕێکخراوى تەندروستیی جیهانی، ڕووداوەکانى هاتوچۆ هەشتەم هۆکارى مردنن، ساڵانە ١.٣ ملیۆن کەس بە ڕووداوەکانی هاتوچۆ گیان لەدەست دەدەن و ٥٠ ملیۆن کەسی دیکەش بریندار و کەمئەندام دەبن.
فەرمانگەی میدیا و زانیاری ڕاشیگەیاند، ڕێوشوێنی تۆمارکردنی سەرپێچی و سزادان و پێبژاردنی دارایی سەرپێچیکارانی هاتوچۆ، یەکێکە لە ڕێگەکانی کەمکردنەوەى ڕووداوەکانی هاتوچۆ و پاراستنی گیان و سامانی هاووڵاتییان لەلایەن حکومەتی هەرێمی کوردستانەوە.
