بەپێی ڕاپۆرتە كەشناسییەكان، بەهۆی ئەو بارانە بەلێزمەیەی چەند ڕۆژێكە هەرێمی كوردستانی گرتۆتەوە، پلەكانی گەرما بەرزدەبنەوە و لەكاتەكانی بەیانی سبەینێ تەمومژ دروست دەبێت و شارەزایەكی كەشناسی دەڵێت: لە دوو ڕۆژی داهاتوودا بەهۆی بەرزبوونەوەی پلەی گەرما و شێوە باران بارین بە بڕی جیاواز دەبارێت.
ئاراس جەبار، شارەزای كەشناسی بۆ (خەڵك) ڕایگەیاند، سبەی دوو شەممە 19/2/2024 لەئەنجامی بەردەوامی کاریگەری لاوازی نزمە پاڵەپەستۆی دەریای ناوەڕاست ئاسمانی ھەرێم بە زۆری نیمچە ھەور ئەبێت و لەکاتەکانی بەیانیدا تەم و مژ ئەبێت.
ڕاشیگەیاند، لە نێوان کاتەکانی پاش نیوەڕۆ بۆ ئێوارە بەھۆی زیادبوونی وزەی گەرمی تیشکی خۆر، شێ و تەڕی ڕووی خاک بەھەڵم ئەبێت و لە شوێنی دیاری نەکراودا لەناوچەکانی پارێزگای سلێمانی و ھەڵەبجە و ھەولێر و دھۆک و ئیدارەی ڕاپەڕین کەش لەبار ئەبێت بۆ دروستبوونی کەڵەکە ھەوری بە بروسکە و تاوە بارانی کورت خایەن چالاک ئەبێتەوە بەڕێژەی جیاواز و کاتەکانی ئێوارە کۆتای پێدێت.
وتیشی، “پلەکانی گەرما بەراورد بە ئەمڕۆ بەرێژەی 2 پلە بەرزدەبنەوە، خێرایی با لەسەرخۆ ئەبێت 5-10کم/ک ئاڕاستەی با ناجێگیر ئەبێت” .
ئەو شارەزایەی كەشناسی باسی لەوەشكرد، بۆ دوو سبەی سێ شەممە بەھەمان شێوە تاوە باران و بروسکە لە شوێنی جیاجیادا بەردەوامی ئەبێت و بارانی ئەمڕۆ و دوو ڕۆژی داھاتووش زیاتر پێکدێت لە بەھەڵمبوونی شێ و تەڕیی ناوخۆیی و دووبارە چڕبوونەوەیەتی بەسەر شوێنی جیاجیادا، کە لەئەنجامی ئەو بارانە زۆرەیە، کە لە ڕۆژانی ڕابردوو باری و ئەمەش سوودی ئەبێت بۆ باشتربوونی شەپۆلەکانی داھاتووی بارانبارین.
