نووسینگەی سەرۆك وەزیرانی عێراق پێكهێنانی ژووری ئۆپەراسیۆنی بۆ كۆكردنەوەی ئاوی لافاو و باراناو كە لە شارەكانی هەرێمەوە ڕوو لە ناوەڕاست و باشوور دەكات ڕاگەیاند.
لە راگەیەندراوێكدا نووسینگەی سەرۆك وەزیرانی عێراق بڵاویكردەوە، بە بڕیاری سەرۆك وەزیران بڕیاردراوە بە پێكهێنانی ژووری ئۆپەراسیۆن بۆ كۆكردنەوە و سوودوەرگرتن لە شەپۆلی لافاوی شارەکانی هەرێمی کوردستان بەمەبەستی زیادكردنی ژێرخانی ئاو.
ئاماژەی بەوەشکرد، ژوورەكە چاودێریی دۆخی بەغدا و پارێزگاكان دەكات بۆ پێشكەشكردنی پاڵپشتیی لۆجیستی و مرۆیی.
ئەمەش لە کاتێکدایە ماوەی سێ ڕۆژە شەپۆلێكی بەهێزی بارانبارین شارەكانی هەرێمی كوردستان و بەشێك لە شارەكانی عێراقی گرتووەتەوە و بەهۆیەوە ئاستی ئاو بەشێوەیەكی بەرچاو بەرزبووەتەوە.
