وەزارەتی دارایی هەرێمی کوردستان هەڵسەنگاندن بۆ ئەو بڕوانامانەی کارمەندانی کەرتی حکومی دەکات کە بە بێ مۆڵەتى خوێندن بە دەست هاتوون.
ئەمڕۆ سێشەممە، ماڵپەڕی فەرمی حکومەتی هەرێمی کوردستان بڵاویکردەوە، وەزارەتی دارایی و ئابووری، لە نووسراوێكی فەرمیدا كە بۆ گشت وەزارەتەكان و فەرمانگەكانی نەبەستراو بە وەزارەتەوە گشتاندوویەتی، پۆلێنی هەڵسەنگاندنی ئەو بڕوانامە دەكات كە بە بێ مۆڵەتی خوێندن بەدەست هاتوون.
لە نووسراوەكەدا هاتووە کە بە پێی نووسراوى ئەنجومەنى وەزیران/ سکرتاریەت ژمارە (١٦٩٢٠) لە (٢٤/١٢/٢٠٢٣) و ئاماژە بە فەرمانى وەزاریمان ژمارە (٧٤٣) لە (٢٢/١/٢٠٢٤) کە تایبەتە بە پێکهێنانى لیژنەیەک بۆ مەبەستى (پۆلێنکردنى هەڵسەنگاندنى حاڵەتەکانى ئەو بڕوانامانەى کە بە بێ مۆڵەتى خوێندن بەدەست هاتوون، لە ڕووی زانستى و کارگێڕى و دارایى و یاساییەوە هەڵسەنگاندن بۆ بڕوانامە بەدەستهاتووەکان دەکرێت.
وەزارەتی دارایی دوو فۆرمی زانیاریشی بۆ وەزارەت و فەرمانگەکان ناردوو و داوای لێکردوون لە ماوەى 15 ڕۆژدا بۆیان ڕەوانە بکەنەوە بۆ ئەوەی کارى پێویستیان بۆ بکرێت.
