شارەزایەکی کەشناسی پێشبینییەکانی کەشوهەوای بۆ ڕۆژانی ئایندە ڕاگەیاند و ئاماژەی بەوەکرد، کەشوهەوا سەقامگیر دەبێت، تەم دروستدەبێت.
ئەمڕۆ سێشەممە، ئاراس جەبار، شارەزای کەشناسی ڕایگەیاند، سبەینێ چوارشەممە ھەرێمی کوردستان و وڵاتانی ناوچەکە دەکەوێتە ژێر کاریگەری بەرزەپاڵەپەستۆیەکی ھەواوە و کەش سەقامگیر دەبێت و ئاسمان بە زۆری بۆ نیمچە ھەور دەگۆڕێت.
ئاماژەی بەوەشکرد، پلەکانی گەرما بەراورد بە ئەمڕۆ بە ڕێژەی 1 بۆ 2 پلە بەرزدەبنەوە، خێرای با لەسەرخۆ دەبێت لە نێوان 5-15 کیلۆمەتر لە کاتژمێرێکدا و ئاڕاستەی با لەگۆڕاندا دەبێت .
ئەوەشی خستەڕوو، لەکاتەکانی ئەمشەو تا بەرەبەیانی سبەینێ ئەگەری دروستبوونی تەم و مژی چر لەسەر زۆربەی ناوچە شاخاوییە سنورییەکان دەبێت، دووبارە کاتەکانی سبەی شەو بۆ بەرەبەیانی ڕۆژی پێنجشەممە تەم و مژ لەناوچە شاخاویەکان بەگشتی دروست دەبێتەوە و لەگەڵ ناوچەکانی سنووری پارێزگای سلێمانی و دھۆک.
