دەستەی نوێنەرانی مامۆستایانی ناڕازی پێنجوێن وەڵامی پەیامەكەی پەروەردەی شارۆچكەكەیان دەدەنەوە بۆ دەستپێكردنەوەی دەوام و ڕایدەگەیەنێت، كە “بە هیچ جۆرێک ناچینە ژێرباری ئەو بڕیارە حیزبیانە و ڕۆژی چوار شەممە خۆپیشاندان ئەنجام دەدەن”.
ئەمڕۆ بەڕێوەبەرێتی پەروەردەی پێنجوێن ئاگادارییەكی بۆ سەرجەم مامۆستایان و خوێندکاران بڵاوكردەوە و ڕایگەیاند، “ڕۆژی چوار شەممە (٢٠٢٤/٢/٧) پەیوەندی بکەنەوە بەسەرجەم ناوەندەکانی خوێندنەوە لەبەرئەوەی دەوام دەست پێدەکاتەوە”.
لای خۆشیەوە، دەستەی نوێنەرانی مامۆستایانی ناڕازی (میلاک و وانەبێژ)ی پەروەردەی پێندوێن لە ڕاگەیەنراوێكدا بڕیارەكەی پەروەردە بۆ دەستپێكردنەوەی دەوام ڕەتدەكاتەوە و ڕایدەگەیەنێت، دوای ئەوەی پەروەردەی پێنجوێن بڵاویان کردەوە، کە چوار شەممە دەوام دەسپێدەکاتەوە، ئێمە وەک مامۆستایانی دامەزراو و وانەبێژانی پێنجوێن بە هیچ جۆرێک ناچینە ژێرباری ئەو بڕیارە حیزبیانە”.
ڕاشیگەیاندووە، ڕۆژی چوار شەممە 7/2/2024 لە بەردەم بینای پەروەردەی پێنجوێن گەورەترین خۆپیشاندان ئەنجام دەدەین.
ئاماژەی بەوەشكردووە، “داواکارین لە مامۆستایان ئامادەبن بێ هیچ پاساوێك”.
