ڕۆژێک دوای وەرگرتنی مووچە، خۆپیشاندانی مامۆستایانی ناڕازی لە سنووری پارێزگاکانی سلێمانی، هەڵەبجە و هەردوو ئیدارەی گەرمیان و ڕاپەڕین دەستیپێکردەوە.
ئەمڕۆ دووشەممە، مامۆستایانی ناڕازی لە ناوچەکانی بایکۆت دەستیان بە خۆپیشاندان و گردبوونەوەی ناڕەزایی کردەوە و جەختیان لە جێبەجێکردنی داواکارییەکانیان کردەوە کە دیارترینیان دابەشکردنی مووچە 30 ڕۆژ جارێك، دەستپێکردنەوەی پلەبەرزکردنەوە و دامەزراندنی وانەبێژانن.
خۆپیشاندانەکەی ئەمڕۆ دوا ڕۆژێک هات بەسەر دابەشکردنی مووچەی مانگی یەکدا، بەڵام مامۆستایان دەڵێن بە دابەشکردنی مووچەیەك ناگەڕێنەوە بۆ هۆڵەکانی خوێندن و دەبێت حکومەت داواکارییەکانیان جێبەجێ بکات.
