شارەزایەكی كەشناسی ڕایدەگەیەنێت، ئەمشەو ئەم شەپۆلی بەفر و سەرمایەی ناوچەكانی هەرێمی گرتۆتەوە كۆتایی دێت و دەشڵێت: “هەفتەی داهاتوو شەپۆلێكی دیكەی بەفر و باران دەستپێدەكات”.
ئاراس جەبار، شارەزای كەشناسی بۆ (خەڵك) ڕایگەیاند، کاریگەری ئەم شەپۆلەی ڕووی کردۆتە بەشێکی ناوچەکان ئەمشەو کۆتایی پێدێت و سبەی شەممە 3/2/2024 کەش سەقامگیر و ئاسمان بەزۆری نیمچە ھەور ئەبێت و پلەکانی گەرما بەراورد بە ئەمڕۆ 1 تا 2 پلە بەرزدەبێتەوە و خێرایی با لەسەرخۆ و ھەندێک کات مامناوەند ئەبێت.
ڕاشیگەیاند، لە پاش نیوەڕۆی دوو سبەی ڕۆژی یەک شەمە 4/2/2024 ناوچەکانمان ئەکەوێتەوە ژێر کاریگەری لاوازی نزمە پاڵەپەستۆیەک، کە سەنتەرەکەی بەسەر باکووری تورکیا و ئێرانە و لەئەنجامی کاریگەریەکانی شەپۆلێکی دیکەی ڕێژە مامناوەندی بەفر و بارانبارین بەشێوەی پچڕ پچڕ ناوچە جیاجیاکانی ھەرێمی کوردستان ئەگرێتەوە.
وتیشی، “لەناوچە شاخاوییەکان بەفر بارین ئەبێت و لەسەنتەری پارێزگاکان و ناوچە نزمەکان بەباران و نزمبوونەوەیەکی کەم لەپلەکانی گەرما کاریگەری ئەبێت و ئەم نزمە پاڵەپەستۆیە لەسەر ناوچەکانمان تا ئێوارەی ڕۆژی سێ شەممە 6/2/2024 کاریگەریەکانی ئەمێنێتەوە”.
ئاماژەی بەوەشكرد، بەگشتی لە ڕۆژی چوار شەممەوە 7/2/2024 بەھۆی درێژبوونەوەی بەرزە پاڵەپەستۆکانی ڕۆژئاوا و باشووری ئەوروپا بۆ سەر ناوچەکانی ڕۆژھەڵاتی ناوەڕاست کەشی ھەرێمی کوردستان ماوەیەکی دیاری نەکراو سەقامگیری و بەرزبوونەوەی پلەکانی گەرما بەخۆیەوە ئەبینێت.
