کەشناسی ڕایگەیاند بە هۆی بارستە هەوایەکی ساردەوە پلەی گەرما بۆ سفر دادەبەزێت و بەفریش لە چەند ناوچەیەك دەبارێت.
پاشنیوەڕۆی ئەمڕۆ پێنجشەممە، بەشی پێشبینی لە وەزارەتی گواستنەوە و گەیاندنی هەرێمی کوردستان ڕایگەیاند، ئەمشەو بارستە هەوایەکى سارد ڕوو لە ناوچەکەمان دەکات و کاریگەرىیەکەی بۆ ماوەى چەند ڕۆژێك دەمێنێتەوە.
ڕوونیشیکردەوە کە بە هۆی شەپۆلە سەرماکەوە پلەى گەرما بە نزیکەى (4-6) پلەى سیلیزى دادەبەزێت و لە ناوچە شاخاوییەکان و سنوورییەکان بۆ سفر پلەى سیلیزى دادەبەزێت.
بەشی پێشبینی وەزارەتی گواستنەوە ڕاشیگەیاند، لەگەڵ هاتنى ئەو بارستە هەوایەدا بەفر و باران لە سەرجەمى ناوچە شاخاوییە سنوورییەکان و ناوچە شاخاوییەکانى باکوور و ڕۆژهەڵاتى هەرێم و بەشێک لە ناوچە جیاجیاکانى پارێزگاى سلێمانى دەبارێت.
ئەوەشی خستەڕوو کە لە سنوورى پارێزگاى هەولێر ئەگەرى نمە باران هەیە و ناوچە شاخاوییەکانىشیدا بەفر و باران دەبارێت و لە بەشێك لە ناوچە شاخاوییە سنوورییەکانى باکوورو باکوورى ڕۆژهەڵاتى پارێزگاى دهۆکیش ئەگەرى بەفر بارینى کەم هەیە .
