سەرۆکی هەرێمی کوردستان ئەو هێرشەی ئیدانە کرد کە کرایە سەر بنکەیەکی ئەمریکا لە ئوردن و بە کارێکی تیرۆریستیش وەسفی کرد.
ئەمڕۆ دووشەممە، نێچیرڤان بارزانی، سەرۆکی هەرێمی کوردستان پەیامێکی لە تۆڕی کۆمەڵایەتی ئێکس بڵاوکردەوە و تێیدا ئەو هێرشەی ئیدانە کرد کە کرایە سەر بنکەیەکی هێزەکانی ئەمریکا لە ئوردن و کوژرانی سێ سەرباز و برینداربوونی دەیانی دیکەی لێکەوتەوە.
سەرۆکی هەرێمی کوردستان لە پەیامەکەیدا دەڵێت: “بە توندی هێرشە تیرۆریستییەکەی سەر هێزەکانی ئەمریکا لە باکووری ڕۆژهەڵاتی ئوردن ئیدانە دەکەم و لە دڵەوە سەرەخۆشی لە کەسوکاری سەربازە کوژراوەکان دەکەم”.
نێچیرڤان بارزانی ڕاشیگەیاند، لەم دۆخە سەختەدا لەگەڵ گەلی ئەمریکاین و هیوای زوو چاکبوونەوەشی بۆ بریندارەکان خواست.
دوێنێ ئەمریکا ڕایگەیاند، لە ئاکامی هێرشی درۆنێکی بۆمبڕێژکراو بۆ سەر هێزەکانیان لە بنکەی تەنەفی سەر سنووری ئوردن، سێ سەربازیان کوژران و 25ی دیکەش برینداربوون.
جۆ بایدن سەرۆکی ئەمریکا، میلیشیاکانی سەر بە ئێرانی بە ئەنجامدانی هێرشەکە تۆمەتبار کرد و بەڵێنی دا لە کات و شوێنێك کە ئەمریکا دەستنیشانی دەکات، تۆڵە بکەنەوە.
