وتەبێژی حکومەتی هەرێمی کوردستان لەسەر هێرشەکەی کۆرمۆر راگەیەندراوێکی بڵاوکردەوە و دەڵێت:” هێرش بۆسه‌ر ژێرخانێکی گرنگی وەک کارەبا کاریگەری راستەوخۆی دەبێت لەسەر ژیانی خەڵک و ئیش و کاروباری رۆژانەیان”.
پێشه‌وا هه‌ورامانی، وته‌بێژی حكومه‌تی هه‌رێمی کوردستان رایگەیاند: شەوی رابردوو هێرشێکی تیرۆریستی کرایە سەر کێڵگەی غازیی کۆرمۆر لە سنووری چەمچەماڵ و ئەنجامەکەی نەمانی کارەبای هاونیشتیمانییانی هەرێمی کوردستان بوو.
راشیگەیاند:”ئەم هێرشە تیرۆریستییە بۆ سەر ژێرخانێکی گرنگی وەک کارەبا کاریگەری راستەوخۆی دەبێت لەسەر ژیانی خەڵک و ئیش و کاروباری رۆژانەیان.”
وته‌بێژی حکومەتی هەرێم داواشیكرد:”هەموو لایەک هاوکاری لیژنەی حکومەتی فیدراڵی بکەن بۆ دۆزینەوە و دەستگیرکردنی تیرۆریستان و سزادانییان و رێگری لە دووبارەبوونەوەی کردەوەی هاوشێوە.”
شەوی رابردوو هێرشکرایە سەر کێڵگەی غازی کۆرمۆر لە چەمجەماڵ و بەهۆیەوە بەرهەمهێنانی غاز لە کارگەکە وەستاو پێدانی کارەباش کەمبووەوە. بەڵام کەمێک لەمەوبەر بەڕێوەبەری کۆمپانیای دانە غاز رایگەیاند، تەواوی کێشە تەکنیکییەکانی کێڵگەی غازی کۆرمۆر چارەسەر کراون و بەرهەمهێنان لە کێڵگەکە دەستیپێکردووەتەوە.
