سەرباری بڕیارەکانی وەزارەتی پەروەردە، بایکۆت لە سلێمانی، هەڵەبجە و گەرمیان و ڕاپەڕین بەردەوامە و ئەمڕۆش مامۆستایان نەچوونەوە بۆ دەوام.
بەردەوامبوونی بایکۆت لە کاتێکدایە کە وەزارەتی پەروەردە و بەڕێوەبەرایەتییەکان فشار دەکەن بۆ شکاندنی بایکۆت و دوێنێش ژمارەیەك لە ئەندامانی ئەنجومەنی مامۆستایانی ناڕازی دەستبەسەر کران.
مامۆستایانی ناڕازی سەرباری جەختکردنەوە لە بایکۆت، بڕیاریانداوە ئەمڕۆ جارێکی دیکە بێنەوە سەر شەقامەکان و خۆپیشاندان بکەن.
دامەزراندنی مامۆستایانی وانەبێژ، دەستپێکردنەوەی پلەبەرزکردنەوە و چارەسەرکردنی کێشەی مووچە دیارترین داواکاری مامۆستایانن، بەڵام تا ئێستا حکومەتی هەرێم هیچیانی جێبەجێ نەکردووە.
