سەرۆکی لیژنەی دارایی پەرلەمانی عێراق رایگەیاند، بەمزوانە بودجەی ٢٠٢٤ دەگاتە لیژنەکە و بە خێرایی کاروبارە پێویستە یاساییەکانی بۆ ئەنجام دەدرێت و رەوانەی پەرلەمان دەکرێت بۆ دەنگدان.
نوسینگەی راگەیاندنی سەرۆکی لیژنەی دارایی بڵاویکردووەتەوە. کە ئەمڕۆ دووشەممە ١٥ی کانوونی دووەمی ٢٠٢٤، لیژنەی دارایی بە سەرۆکایەتی عەتوان عەتوانی دەستی بە کۆبونەوەکانی کردەوە و لە یەکەم کۆبونەوە گفتوگۆ لە بارەی کۆمەڵێک بابەتی پەیوەست بە کاری یاسایی و چاودێری کرا.
لە راگەیەندراوەکەدا هاتووە، لە کۆبونەوەکەی ئەمڕۆ لیژنەی دارایی پرسی پێداچونەوەی بە کاری لیژنەکە لە وەرزی یاسادانانی پێشو و دیاریکردنی پێشەنگییەکانی قۆناغی داهاتوو بەپێی بەرنامەی وزاری تاوتوێ کرا.
بەگوێرەی راگەیەندراوەکە، سەرۆکی لیژنەکە ئاماژەی بەوەکردووە کە چاوەڕێی گەیشتنی بودجەی ٢٠٢٤، بۆ ئەوەی رێکارە پێویستەکانی بۆ ئەنجام بدەن و پێشنگییەکانی بەپێی کارنامەی وزاری دیاری بکەن.
دەشڵێت:”پارەی زیاتریان بۆ پارێزگاکان دابینکردوە لەپێناو جێبەجێکردنی پڕۆژە ستراتیژییەکان، چونکە پێویستە کار لەسەر نەهێشتنی پڕۆژە تەواونەکراوەکانی وەک قوتابخانەکان بە نموونە بکرێت”.
