بەڕێوەبەری پاسپۆرتی پارێزگای سلێمانی سەردانی بەڕێوەبەرایەتی پاسپۆرتی پارێزگای هەڵەبجەی کرد و رایگەیاند، لە چەند رۆژی داهاتوودا سیستمی نوێی پاسپۆرتی ئەلیکترۆنی لەو پارێزگایەش بەرووی هاووڵاتییاندا دەکرێتەوە.
سالار عەبدوڵڵا، بەڕێوەبەری پاسپۆرتی سلێمانی ڕایگەیاند:”ئێمە ماوەی دوو مانگێکە خەریکی بەدواداچوونین بۆ ئەم کارە، بەغداد ئیشی باشی تێدا کردووە لەسەرو بەندەدا و لە چەند رۆژی ئایندەدا سیتسمی نوێی پاسپۆرتی ئەلیکترۆنی بەروی هاوڵاتیان لە هەڵەبجە دەکرێتەوە.
دەربارەی کاتی وەرگرتنەوەش وتی:”هاووڵاتییان دەتوانن دوای تەواوبوونی مامەڵەکانیان لە ناو بەڕێوەبەرایەتی پاسپۆرتی ھەڵەبجە لە زووترین ماوە دەتوان ببنە خاوەنی پاسپۆرت”.
سەبارەت بە کەمکردنەوەی نرخی پاسپۆرتی ئەلیکترۆنی وتیشی:”ئێمە بۆ کەمکردنەوەی نرخی پاسپۆرتی ئەلیکترۆنی نوسراومان بۆ بەغداد کردووە،بەڵام ئەوان لە وەڵامیاندا پێیان راگەیاندین کە کوالێتی و تێچووەکەی زۆر بەرزە ، ئامیرەکانیشی کە بەکاردێن لە بەڕێوەبەرایەتی و فرۆکەخانەکان وا دەکات کە نرخەکەی بەرز بکرێتەوە، وەزارەتی ناوخۆی عێراقیش لەگەڵ کۆمپانیایەکی فەرەنسی گرێبەستیان کردووە و بەو نرخە گونجاندوویانە”.
بەڕێوەبەری پاسپۆرتی پارێزگای سلێمانی رایگەیاند کە پاسپۆرتە نوێیەکە لە رووی کوالێتی و دیزاینەوە هاوشێوەی پاسپۆرتی وڵاتانی پێشکەوتووی جیهانە، زانیارییە کەسییەکانی هەڵگرەکەشی دەگاتە هەموو وڵاتانی جیهان، بۆیە ناتوانرێت ساختە بکرێت یان کەسێکی دیکە سودی خراپی لێوەربگرێت.
