بەهۆى ئاگرکەوتنەوە له نه‌خۆشخانه‌ی ژنان و منداڵبوون لە پارێزگای دیوانیه چوار منداڵ گیانیان لەدەستدا و ٣٣ منداڵیش برینداربوون و وەزیری تەندروستی عێراقیش دەڵێت: نەخۆشخانەکە چۆڵکراوە.
ئەمڕۆ دووشەممە، میدیا عێراقییەکان بڵاویانکردەوە، ئاگر لە نەخۆشخانەی ژنان و منداڵبوون لە پارێزگای دیوانیە کەوتەوە و دوابەدوای رووداوەکەش، ساڵح حەسناوی، وەزیری تەندروستی عێراق بۆ دیاریکردنی کاردانەوە و هۆکارەکانی رووداوەکە گەیشتە نەخۆشخانەکە.
بەهۆی رووداوەکە چوار منداڵ گیانیان لەدەستدا ٢٠ منداڵیش تووشی تەنگەنەفەسی بوون و سەرجەم بریندارەکان بۆ نه‌خۆشخانه‌ی حسێن و نه‌خۆشخانه‌ی گشتی دیوانییە گواستراونه‌ته‌وه و لە ژێر چاودێری وردی پزیشک دان.
هەروەها محەمەد شیاع سودانی، سەرۆکوەزیرانی عێراقیش رایگەیاندووە، ئەو کەسانەی کەمتەرخەمبوون پێویستە دووربخرێنەوە.
ساڵح حەسناوی، وەزیری تەندروستى عێراقیش رایگەیاند، دەستیان کردووە بە لێکۆڵینەوە لە رووداوەکە و بەڕێوەبەرى نەخۆشخانەکەش لە پۆستەکەى دورخراوەتەوە.
