![](https://xelk.org/wp-content/uploads/2024/03/awincity2.png)
پەروەردەی رانیە رایگەیاند، نووسراوی ئاساییکردنەوەی دەوام و کەمکردنەوەی پڕۆگرامەکانیان بۆ سەرجەم ناوەندەکانی خوێندن ناردووە و بڕیارە سبەینێ سێشەممە دەست بە دەوام بکرێتەوە. داواش دەکات ئەو مامۆستا و وانەبێژانەی ئامادەنین دەوام بکەن، بە لیستێک ناوەکانیان بۆ پەروەردە بنێردرێت.
بەڕێوەبەرایەتییەکە لە راگەیەندراوێکدا دەڵێت:”نوسراوی ئاسایی کردنەوەی دەوام و دەستپێکردنەوەی دەوام و کەمکردنەوەی پڕۆگرامەکان نێردراوە بۆسەرجەم ناوەندەکانی خوێندن و بڕیارە سبەینێ ڕۆژی سێشەممە ڕێکەوتی ٩ی کانوونی دووەمی دەرگای قوتابخانەکان بەڕووی قوتابیان و خوێندکاران و مامۆستایان دا بکرێتەوە”.
پەروەردەی رانیە ئاگادری سەرجەم بەڕێوەبەرە بەڕێزەکان دەکاتەوە کەڕێکاری یاسایی و کارگێڕی دەگیرێتەبەر لەسەر ڕۆشنایی ئەم خاڵانەی خوارەوە :
یەکەم / پێویستە سەرجەم ناوەندەکانی خوێندن لەپەیجی فەرمی قوتابخانەکانیانەوە ئاگاداری قوتابیان بکەنەوە کە ڕۆژی سێشەممە بێنەوە بۆ قوتابخانە .
دووەم : لەگروپی تایبەتی مامۆستایانی قوتابخانەکانتان خشتەی ڕۆژانەی وانەکان دابنێن و ئاگاداری مامۆستایان بکرێت بۆ پابەندبوون بەدەوام .
سێیەم : ئەو بەڕێوەبەر و یاریدەدەرانەی کە ئامادەنین بۆ دەستپێکردنەوەی دەوام یاداشتێک بنوسن و سبەینێ ڕۆژی سێشەممە ئاڕاستەی پەروەردەی بکەن .
چوارەم : ئەو مامۆستا بەڕێزانەی ئامادەنین دەوام بکەن بەلیستێک ناوەکانیان بنێردرێت بۆ پەروەردە .
پێنجەم : ئەو مامۆستا وانەبێژە بەڕێزانەی ئامادەنین بۆ دەوام بەلیستێک ناوەکانیان بنێردرێت بۆ پەروەردە .
شەشەم : سەرجەم سەرپەرشتیارە بەڕێزەکان ڕاسپێردراون سبەینێ ڕۆژی سێشەممە سەردانی ناوەندەکانی خوێندن بکەن بۆ بەدواداچونی دەستپێکردنەوەی دەوام” .