مامۆستایانی ناڕازی مەرجی شكاندنی بایكۆت دەخەنە بەردەم حكومەتی هەرێم و جەخت دەكەنەوە، كە هەرگیز كۆڵ نادەین لە داواكاریەكانمان و ڕێگای بەغدادیش بەرنادەین.
مامۆستا ئاوات ئازاد، نوێنەری مامۆستایانی ناڕازی لە هەژماری خۆی لە فەیسبووك ڕایگەیاندووە، مامۆستایانی ناڕازی بەهیچ بەڵێنێكی زارەكی ڕازی نابن جگە له كردار و نووسراوێكی فەرمی، كە بە زوترین كات جێبەجێ بكرێت بۆ پلە بەرزكردنەوە و دابەش كردنی مووچە هەموو مانگێك واتە ٣٠ ڕۆژ جارێك.
ڕاشیگەیاندووە، پلەبەرزكردنەوە سوودی نابێت، كە مووچە لە كاتی خۆیدا دابەش نەكرێت و ساڵ 9 مانگ بێت لەهەرێم.
جەختیشی كردۆتەوە، وانە بێژانیش جێ ناهێڵین و دەبێت ئەوانیش بكرێنە هەمیشەی نەك گرێبەست.
مامۆستا ئاوات دەشڵێت: هەرگیز كۆڵ نادەین لە داواكاریەكانمان و ڕێگای بەغدادیش بەرنادەین، ئێمەی مامۆستایان متمانەمان بەم دەسەڵاتە نیە دەمانەوێت مووچەكانمان ڕاستەوخۆ لە بەغدادەوە وەرگرین.
