وتەبێژی پۆلیسی گەرمیان ئاشكرای دەكات، ئه‌مشه‌و لە سنووری شارۆچكەی کەلار ماڵێک ئاگری گرت و دواتریش کوڕی ماڵەکە لەسەر سکاڵای دایکی دەستگیرکرا.
عەلی جەمال قدوری، وتەبێژی پۆلیسی گەرمیان لە ڕاگەیەنراوێكدا ئاماژەی بەوەكردووە، ئەمشەو دوو شەممە، لە شارەدێی رزگاری سەر بە شارۆچكەی کەلار، ماڵێک ئاگری گرتووە و دوابەدوای ئاگادارکردنەوەیان، تیمەکانی بەرگری شارستانی گەیشتوونەتە شوێنی ڕووداوەکە و توانیویانە ئاگرەکە کۆنتڕۆڵ بکەن.
ڕاشیگەیاندووە، لە ماڵەکەدا دایک و کوڕێک دەژین و دوای کۆنتڕۆڵکردنی ئاگرەکە، هیچ کەسێک سکاڵای تۆمارنەکردووە و بە وتەی خۆیان، ئاگرەکە بەهۆی شۆڕتی کارەباوە بووە، بەڵام دوای کاتژمێرێک لە ڕووداوەکە، ئەو ژنەی لە ماڵەکەدا دەژیا سەردانی یەکێک لە بنکەکانی پۆلیسی کردووە و سکاڵای لەسەر کوڕەکەی تۆمارکردووە بە تۆمەتی ئەوەی ئەو ئاگرەکەی کردۆتەوە.
وتەبێژی پۆلیسی گەرمیان دەشڵێت: “دوای تۆمارکردنی سکاڵاکەی دایکی، بە بڕیاری دادوەر تۆمەتبار (ب.ع.ع)ی لەدایکبووی 1999 لەلایەن هێزەکانمانەوە دەستگیرکرا و لە ئێستاشدا ڕاگیراوە و لێکۆڵینەوەکانیش لەگەڵیدا بەردەوامە”.
