وتەبێژی پارتی دیموکراتی کوردستان ڕایدەگەیەنێت، تێبینیمان لەسەر پرۆسەکە ھەبوو، چ لە پێش ئەنجامدانی پرۆسەکە و چ لەکاتی بەڕێوەچوونی پرۆسەکەدا. ھەروەھا جەخت دەکاتەوە، کە ئامادەن بۆ دیالۆگ و ڕاگۆڕینەوە بۆ پێکھێنانی حکوومەتە خۆجێییەکانی پارێزگاکان،
دەقی ڕاگەیاندراوەکەی پارتی
ھاووڵاتیانی بەڕێز
لە ڕوانگەی بڕوابوونمان بە دیموکراسی و پرۆسەی ھەڵبژاردن و بەشداریی سەرجەم پێکھاتە نەتەوەیی و ئاینییەکان لە پرۆسەی حوکمڕانی عێراق لە چوارچێوەی دەستووری ھەمیشەیی و، جێبەجێکردنی ڕێککەوتننامە سیاسییەکان و کارنامەی کابینەی حکوومەتی فیدڕاڵی، بە تایبەت ئەو بابەتانەی ھۆکارن بۆ سەقامگیری و ئاساییکردنەوەی بارودۆخەکان، وەکو ڕێککەوتنی شنگال و ئاساییکردنەوەی دۆخی شاری کەرکووک.
سەرەڕای ھەبوونی تێبینیمان لەسەر کۆی پرۆسەکە, بەڵام بەشداریمان کرد لە پرۆسەی ھەڵبژاردنەکانی ئەنجوومەنی پارێزگاکانی عێراق و, ڕاشکاوانە ڕایدەگەیەنین، کە تێبینیمان لەسەر پرۆسەکە ھەبوو، چ لە پێش ئەنجامدانی پرۆسەکە و چ لەکاتی بەڕێوەچوونی پرۆسەکەدا، بە تایبەت ئاستەنگی زۆر بۆ پارتیمان دروستکرا، ھەر لە گوشارە ئەمنی و سیاسییەکانەوە تاوەکو بەکارھێنانی لایەنی دارایی بۆ کڕینی ویژدانی ھەندێک خەڵک، بەڵام ھەڤاڵانمان و جەماوەری سەربەرزی پارتیمان بە گڕوتینەوە بەشداربوون و گرفت و ئاستەنگەکانیان تێپەڕاند.
ئێستاش دوای ڕاگەیاندنی ئەنجامەکان لەلایەن کۆمسیۆنەوە، سەرباری تێبینییەکان و تۆمارکردنی سکاڵای یاسایی، چونکە لە قەبارەی ڕاستەقینەی ھەندێک لایەن دڵنیانین و, دڵنیاین دەنگەکانی پارتیمان زیاترە لەوەی ڕاگەیاندراوە و، ئەم کەم و زیادکردنە پەیوەستە بە حیساباتی سیاسییەوە.
سەرباری تانە و تێبینییەکانمان, وەکو پارتی دیموکراتی کوردستان ئامادەین بۆ دیالۆک و ڕاگۆڕینەوە بۆ پێکھێنانی حکوومەتە خۆجێییەکانی پارێزگاکان، لەسەر بنەمای شەراکەت و جێبەجێکردنی ڕێککەوتننامە سیاسییەکان و ئاساییکردنەوەی بارودۆخی ئەو ناوچانەی کە پێشتر ڕێککەوتنیان لەبارەوە کراوە و، دابینکردنی ئاسایش و خزمەتگوزاری بۆ ھاووڵاتیان بەبێ جیاوازی.
