شارەزایەكی كەشناسی پێشبینییەكانی بۆ دۆخی كەشوهەوای سەری ساڵ و هەفتەی یەكەمی مانگی 1ی ساڵی 2024 بڵاودەكاتەوە و ڕایدەگەیەنێت، تا ئێستا هیچ شەپۆلێكی بەفر بارین بۆ سەنتەری شارەكان دەرنەكەوتووە.
سیروان ساڵح، شارەزای كەشناسی بۆ (خەڵك) ڕایگەیاند، سبەینێ و دوو سبەی شەپۆلێکی بارانبارینی دەریای سوور سعودیە و ناوەڕاست و باشووری عێراق دەگرێتەوە، بەشێکی زۆرکەمی بەشێوەی دڵۆپەباران سبەی شەو ناوچەکانی باشووری گەرمیان دەگرێتەوە، کە بڕەکەی تا ئێستا ناگاتە 1 ملم.
ڕاشیگەیاند، تا ئەم کاتە ئەو شەپۆلە هیچ ناوچەیەکی تر لە گەرمیان و هەرێمی کوردستان ناگرێتەوە.
وتیشی، “سەبارەت بە هەفتەی یەکەمی مانگی 1ی 2024 شەپۆلێکی بارانبارین دەرکەوتووە لە نێوان ( 4 ی 1 تاوەکو 8 ی 1 ) هێشتا بڕی باران و کاریگەری ئەو شەپۆلە ڕوون نیە و جێگیر نییە”.
جەختیشی كردەوە، تاوەکو ئەم کاتە هیچ شەپۆلێکی بەفربارین و سەرما بۆ سەنتەری شارە گەورەکان دەرنەکەوتووە.
ئەمە لەكاتێكدایە، كە ئەمڕۆ چەند میدیایەك هەواڵی ئەوەیان بڵاوكردەوە، كە لە سەرەتای ساڵی نوێوە شەپۆلێكی سەرمای بەهێز هەرێم دەگرێتەوە و بەفر لە سەنتەری شارەكان دەبارێت.
