ئەمڕۆ شەممە، وەزارەتی بەرگری تورکیا ڕایگەیاند، شەش سەربازیان لە هەرێمی کوردستان کوژراوە و سەربازێکیش برینداربووە.
وەزارەتی بەرگری تورکیا ئاماژەی بەوەشکردووە، دوێنێ هەینی لە ئۆپەراسیۆنێکدا لە هەرێمی کوردستان، شەش سەربازیان کوژراون و یەکی دیکەشیان برینداربووە.
ئەوەش لەکاتێکدایە، ڕۆژی ١٨ی مانگی نیسانی ٢٠٢٢، وەزارەتی بەرگری تورکیا ئۆپەڕاسیۆنێکی بۆسەر چەند ناوچەیەکی هەرێمی کوردستان لەژێر ناوی “چنگ قفڵ” راگەیاند و تێیدا ناوچەکانی مەتینا و زاپ و ئاڤاشینی بە چڕی بۆردوومان کرد و هەتا ئێستاش لە ئەنجامدانی ئۆپەراسیۆنەکە بەردەوامە.
هاوکات، تورکیا لەنوێترین ڕاگەیەنراودا جەختی لە بەردەوامی هێرش و ئۆپەراسیۆنەکان بۆسەر هێزەکانی سوریای دیموکرات “هەسەدە” کردەوە.
