ئەمڕۆ هەینی فڕۆکە جەنگییەکانی تورکیا چەندین جار سنووری گوندەکانی وڵاتژێرییان لە دەڤەری بارزان بۆردومان کردووە و بۆردومانی فڕۆکەکانی تورکیا لە سنووری هەرێمی کوردستان بەردەوامە و رۆژی سێشەممە (5ــی ئەم مانگە) جارێکی دیکە فڕۆکە جەنگییەکانی تورکیا نزیک سەنتەری ناحیەی بامەڕنێ لە قەزای ئامێدییان بۆردومانکرد و بەهۆیەوە هاووڵاتییەک شەهید بوو و سێ هاووڵاتی دیکەش برینداربوون.
یەکێکە لە بیانووەکانی تورکیا کە ماوەی جەندین ساڵە دەیهێنێتەوە بوونی چەکدارانی پارتی کرێکارانی کوردستان (پەکەکە)یە لە هەرێمی کوردستان و بەوهۆیەوە تورکیا ئۆپەراسیۆنی سەربازی لەدەرەوەی سنوورەکانی خۆی ئەنجام دەدات و لەناو خاکی عێراق و سوریا هێش دەکاتە سەر گروپە کوردییەکان و ئاماژەش بەوەدەکات لەپێناو پاراستنی ئاسایشی ناوخۆی وڵاتەکەی و سنوورەکانی بەردەوام دەبێت لە بەگژداچوونەوەی ئەو گرووپانە.
ئۆپەراسیۆنی ” قفڵی چنگ”ـی تورکیا لە مانگی نیسانی ٢٠٢٢دا لە ناوچە سنوورییەکانی هەرێمی کوردستان و باکووری کوردستان دەستپێکرد، بە ئامانجی نەهێشتنی چەکدارانی پارتی کرێکارانی کوردستان (پەکەکە) لە ناوچەکە، کە زنجیرەیەک ئۆپەراسیۆنی سەربازی دژی ئەو پارتانە لە سووریا و عێراق ئەنجامدا.
جگە لەزیانە گیانییەکان و کوژرانی هاوڵاتیانی مەدەنی لە هەرێمی کوردستان بەهۆی هێرشەکانی تورکیاوە چەندین زیانی ماددی زۆر بە هاوڵاتیان گەیشتووە و هاوڵاتیان ناچاربوون ناوچەکانیان چۆڵ بکەن.
