ئەمڕۆ ئەنجومەنی وەزیران کۆبووەوە و بارودۆخی کارەبا تاوتوێ کرا، بەڵام هیچ بڕیارێک بۆ کەمکردنەوەی نرخەکان نەدرا.
حکومەتی هەرێم لە راگەیەندراوێکدا ئاماژە بەوەدەکات، سیستمی پریپەیدی پێدانی پارەی کارەبا لەسەر حیسابی هیچ پارێزگا و گەڕەک و ناوچەیەکی کوردستان نییە بەڵکوو وەزارەتی کارەبا بە دادپەروەرانە بڕی کارەبای بەرهەمهاتوو دابەش دەکات و ئەم پڕۆژەیە، تەنیا شێوازی پێدانی پارەی کارەبایە،
ڕاشیگەیاند، ئەنجومەنی وەزیران دووپاتی دەکاتەوە کە پڕۆژەی پریپەید نابێت بارگرانی لەسەر دارایی هاووڵاتییان دروست بکات و ئامانج لێی کۆکردنەوەی داهاتە بە شێوازێکی هاوچەرخانە تاکو داهاتەکە بخرێتەوە خزمەتی پڕۆژەکانی زیادکردنی وزەی کارەبای نیشتیمانی و خزمەتگوزارییەکە و بەکارهێنانی کارەبای بەرهەمهاتوو بەشێوەیەکی ئابووریانەتر کە دەمژمێری زیاتری کارەبا دابین بکات.
حکومەتی هەرێم داوا لە هاووڵاتییانیش دەکات کە هاوکار و یارمەتیدەری حکومەت بن لە ڕێگەی كەمكردنەوەی زیادبەكارهێنانی كارەبا و دانی رسوماتی کارەبا بەشێوەیەکی ڕێک و بەردەوامی، بۆ ئەوەی حکومەتیش بتوانێت بەشێکی خەرجییە زۆرەکانی بەرهەمهێنانی کارەبا دابین بکات و کارەبا بە باشی بە هاووڵاتییان بدات.
لەبەشێکی تری ڕاگەیەندراوەکەدا ئاماژە بەوەکراوە، وەزیری دارایی کورتەیەکی دەربارەی ئەنجامی سەردانەکەیان بۆ بەغدا خستەڕوو کە بۆ گفتوگۆکردن بوو لەبارەی برەودان بە هەماهەنگیی و هاریکاریی هەردوو حکومەتی فیدڕاڵ و هەرێم سەبارەت بە کاروباری دەروازە سنوورییەکان و گومرگ بە ڕەچاوکردنی دەسەڵاتە دەستوورییەکان و پەرەپێدانی هەمەچەشنکردنی سەرچاوەکانی داهات لە عێراق و هەرێم لەپێناو زیادکردنی داهاتی گشتیی وخەرجکردنەوەی لە پڕۆژەکانی خزمەتی گشتیدا.
هەروەها حکومەتی هەرێم پرسە و سەرەخۆشی ئاراستەی بنەماڵە و کەسوکاری قوربانییانمان کرد و هیوای چاکبوونەوەی خێراشمان بۆ برینداران خواست. دامەزراوەکانی حکومەتمان ڕاسپارد کە بەدواداچوون بۆ ڕێکارەکانی سەلامەتی لە شوێنە گشتی و تایبەتەکان بکەن بەتایبەتی کە بڕیاری ئەنجومەنی وەزیران هەیە بۆ لەبەرچاوگرتنی ڕێکارەکانی سەلامەتی لەو شوێنانە.
ئەنجومەنی وەزیران لە کۆتاییدا، بڕیاریدا ڕۆژی 2023/12/18 بەبۆنەی ئەنجامدانی هەڵبژاردنی ئەنجومەنی پارێزگاکانی عێراق ، لە تەواوی پارێزگا و ئیدارە سەربەخۆکانی هەرێمی کوردستانیش پشووی فەرمی بێت.
هەروەها بە بۆنەی نزیکبوونەوەی بۆنەکانی جەژنی لە دایکبوون ( کریسمس) و سەری ساڵی نوێی زایینی، وێڕای پیرۆزبایی ئەنجومەنی وەزیران بە بۆنەی یادی لە دایکبوونی حەزرەتی مەسیح (سڵاوی خوای لەسەربێت)، ڕۆژانی پشووی ڕاگەیاند کە ڕۆژانی 12/25 تا 2024/1/1 پشووی فەرمی دەبێت لەسەرجەم دامودەزگاکانی هەرێمی کوردستان بە ڕەچاوکردنی تایبەتمەندیی دامەزراوە خزمەتگوزارییە بەردەوامەکان.
