نرخی مریشك ڕۆژ بەڕۆژ زیاتر ڕوو لە دابەزین دەكات و مریشك فرۆشێكیش دەڵێت: “بڕەكەی زۆر بووە لە بازاڕدا و هەناردەی ناوچەكانی عێراق ناكرێت بۆیە هەرزان بووە”.
ئەمڕۆ دوو شەممە 11ی 12 بە بەراورد بە مانگی ڕابردوو، نرخی کیلۆیەک مریشکی زیندوو زیاتر لە هەزار و 500 دینار دابەزیوە بەراورد بە هەفتەی ڕابردووش 500 دینار دابەزیوە، لەكاتێكدا لە سەرەتای مانگی ڕابردوودا كیلۆی گەیشتبووە نزیكەی 4 هەزار دینار.
یونس، كە كاری فرۆشتن و چاك كردنی مریشك دەكات لە سلێمانی بۆ (خەڵك) ڕایگەیاند، ئەمڕۆ نرخی مریشك زیاتر دابەزیوە و كیلۆیەك مریشكی زیندوو بووە بە 2 هەزار و 500 دینار بۆ ئەو مریشكانەی كێشیان لە نزیكەی 3 كیلۆ و بەرەو سەرەوەیە.
ڕاشیگەیاند، مریشكی ناسكی 2 كیلۆ و 2 كیلۆ و نیو نرخەكەی كەمترە و كیلۆی بە 2 هەزار دینارە.
ئەو مریشك فرۆشە، هۆكاری هەرزان بوونی نرخی مریشكی زیندووی بۆ زۆری بەرهەمی كێڵگە پەلەوەرییەكان و هەناردە نەكردنی بۆ ناوچەكانی ناوەڕاست و خوارووی عێراق گەڕاندەوە.
