ئەمڕۆ چوارشەممە بە ئامادەبوونی محەمەد شیاع سودانی سەرۆكوەزیرانی عێراق كۆنفرانسی “چاكسازی لە سیستەمی باج لە عێراق” دەستیپێكرد ،بابەتە سەرەکییەکانی کۆنفرانسەکە بریتی دەبن لە سیاسەتی باج، یاسادانان، حوكمڕانی و كارگێڕی و ژمێریاری باج.
سەبارەت بە ئامانجەکانی کۆنفرانسەکە ئاماژە بەوەکراوە، یەکێک لە ئامانجەکانی بریتییە لە هەمواركردنەوەی یاسای باج کە لە لە بەرژەوەندی ژینگەی کارکردندا نییە لەگەڵ پەرەپێدانی لایەنی كارگێڕی باج و لێهاتوویی كارمەندەكانی بۆ بەرزكردنەوەی ئاستی باجدان و وەرگرتن.
ئەوەشخراوەتەڕوو، کاردەکرێت بۆ ڕاستكردنەوەی كەموكوڕیەكانی ژینگەی كاری باج بە شێوەیەك كە خزمەت بە پرۆسەی گەشەپێدانی ئابووری وڵات بکات، بەدیهێنانی دادپەروەری باج و كەمكردنەوەی بارگرانی پێدانی باج لەسەر باجدەران، ئاسانكاریكردنی ڕێكارەكانی باج و پەسەندكردنی فەرمانی باجدان و سەرلەنوێ سەیركردنەوەی سیاسەتی باج و گومرگی لە عێراق لە ژێر ڕۆشنایی ئابووری بازاڕ و بەهێزكردنی پێگەی عێراق لە پۆلێنبەندییە نێودەوڵەتییەكان لە بواری كاری باج و بڵاوكردنەوەی كلتوری باج لە نێوان ئەوانەی كە ئەركی پێدانی باجیان لەسەرە بە ڕەنگدانەوەی داهاتی باج لە ڕێگەی پێشكەشكردنی خزمەتگوزاری باش و دروستكردنی وەبەرهێنان كە بەشدارە لە دابینكردنی هەلی كار كە داهاتی بەردەوام دروست دەكات.
لەکۆنفرانسەکەدا لە کۆی ٤٠ توێژینەوە ١٢ توێژینەوەی براوە تاوتوێ دەکرێن کە تایبەتمەندن بە چەند بابەتێک و لەلایەن لایەنە حکومییەکانەوە پێشکەش کراون لەگەڵ کۆمپانیاکانی کەرتی تایبەت و دەزگا ئەکادیمییەکان و نێو دەوڵەتییەکان.
