شارەزایەکی کەشناسی پێشبینییەکانی بۆ بارانبارینی ئەم مانگە بڵاوکردەوە و ڕایگەیاند، ” ئەم مانگە بارانی زۆر باش بەڕێوەیە”.
ئەمڕۆ یەکشەممە، ئاراس جەبار، شارەزای کەشناسی ڕایگەیاند، لە ٦ی مانگەوە پێشبینی دەستپێکردنەوەی کاریگەری نزمەپاڵەپەستۆکانی دەریای ناوەراست و سوور بۆ سەر ناوچەکانمان دەکرێت و ئەم مانگە بارانی زۆر باش دەبارێت.
ئاماژەی بەوەکرد، بارانبارین بەچەند قۆناغێکی یەک لە دوای یەک دەبێت کە مەودای نێوان بارانەکان نزیک دەبن لەیەک، ئەگەری ھەیە چەند شەپۆلێکی بارانبارین لە نێوان ٦ بۆ ٢٠ی مانگ بە ڕێژەی مامناوەند و زۆر باش ھەرێمی کوردستان بگرێتەوە لەگەڵ بارینی بەفرێکی زۆریش لەسەر ناوچە شاخاویە سنووریەکان و ناوچەکانی ڕۆژھەڵاتی کوردستان بە تایبەت لە دوای ناوەڕاستی مانگەوە .
ئاراس جەبار ئەوەشی خستەڕوو، بەگشتی پێشبینی دەکرێت ئەم مانگە باراناوی بێت و بەراورد بە مانگی ڕابردوو ژمارەی شەپۆلەکان زیاتر ببێت، بۆ بەفر بارین و ھاتنی شەپۆلی سەرما لەسەنتەری شارەکان و ناوچە شاخاویە نزمەکان بۆ ئەم مانگە تا ئێستا ھیچ دیار نییە.
