وەزارەتی ئاوەدانکردنەوە ڕایگەیاند، وادەی پڕکردنەوەی فۆڕمی یەکەی نیشتەجێبوون تا کۆتایی ئەمساڵ درێژ کرایەوە.
ئەمڕۆ چوارشەممە، وەزارەتی ئاوەدانکردنەوە و نیشتەجێکردن ڕایگەیاند، وەک دەرفەتێک و رەخساندنی هەلی زیاتر بۆ هاووڵاتییان، لەسەر راسپاردەی دانا عەبدولکەریم، وەزیری ئاوەدانکردنەوەو نیشتەجێکردن پڕکردنەوەی فۆڕمی یەکەی نیشتەجێبوون بۆ خێزانە کەمدەرامەتەکان ماوەی مانگێک درێژ دەکرێتەوە.
پێشتر رۆژی 30/11/2023 وەک دوا وادە بۆ پڕکردنەوەی فۆڕمەکە دیاری کرابوو، بەڵام ئەمڕۆ وادەکەی تا کۆتایی ئەمساڵ درێژکرایەوە.
رۆژی 8/8/2023، لە دوای تەواوکردنی ڕێکار و ئامادەکارییەکان، وەزیری ئاوەدانکردنەوەو نیشتەجێکردن لە رێوەرەسمێکدا پرۆسەی دابەشکردنی فۆڕمی یەکەی نیشتەجێبوونی بۆ خێزانە کەمدەرامەتەکان ڕاگەیاند، لەوکاتەوە زیاتر لە 22 هەزار خێزان لەسەرجەم ناوچەکان فۆڕمەکەیان پڕکردووەتەوە.
یەکەکان زیاتر لە نۆ هەزارن و لە چوارچێوەی یاسای نیشتەجێبووندا دروستکراون، کە بەشێکیان تەواوکراون و بەشێکیان کارکردن تیایاندا بەردەوامە.
