وتەبێژی حکومەتی هەرێمی کوردستان ڕەتیدەکاتەوە ڕێگرییەکەی بازگەکانی سوپای عێراق لە چوونی مامۆستایان بۆ خۆپیشاندان لە بەغدا لەسەر داوای هەرێم بووبیت.
بڕیاربوو ڕۆژی یەکشەممە، مامۆستایانی ناڕازی سلێمانی، هەڵەبجە، گەرمیان و ڕاپەڕین لە گۆڕەپانی تەحریری بەغدا خۆپیشاندان بکەن، بەڵام لە بازگەکانی سوپای عێراق ڕێگرییان لێ کرا و دوای چەند کاتژمێرێك مانەوە لە بازگەکان، بە ناچاری گەڕانەوە بۆ شارەکانیان.
دەنگۆی ئەوە بڵاوبووەوە کە دەسەڵاتی هەرێمی کوردستان لە پشت ڕێگرییەکەوە بووە و داوای لە بەرپرسانی بەغدا کردووە، ڕی نەدەن خۆپیشاندانەکەی بەغدا ئەنجام بدرێت.
سەبارەت بەو دەنگۆیەش پێشەوا هەورامانی، وتەبێژی حکومەتی هەرێمی کوردستان، بە دەنگی ئەمریکای ڕاگەیاند، “ڕاست نییە و هیچ هەوڵێکی وانییە. هیچ هەوڵێک لە نێوان حکومەتی هەرێم و عێراق نییە بۆ ڕێگری لە مامۆستایان”.
وتیشی: “ئەگەر هەوڵێک هەبێت بۆ ڕێکەوتنی مووچەیە بۆ مامۆستایان و توێژەکانی تر نەک ڕێگری کردنیان”.
هەورامانی جەختیشیکردەوە “ئەگەر حکومەتی هەرێم ڕێگری بکردایە لە بازگەکانی خۆیەوە دەیکرد، چ پێویست بوو لە بازگەکانی عێراقەوە بیکات.”
وتەبێژی حکومەتی هەرێم وتیشی: “ڕوونە کە هەوڵی مامۆستایان هەوڵی ئێمەشە. ئێمەش هەمان بۆچوونمان هەیە کە ماف و ئیمتیازاتی مووچە و حەقی خەڵکی هەرێم لای حکومەتی عێراقە.”
