شارەزایەكی كەشناسی پێشبینی هاتنی شەپۆلێكی باران و بەفر بارین بۆ ناوچەكانی هەرێمی كوردستان دەكات و ڕایدەگەیەنێت، كە شەپۆلەكە دوو ڕۆژ بەردەوام دەبێت و كەشێكی زستانی هەرێم دەگرێتەوە.
محەمەد كەمال، شارەزای كەشناسی بۆ (خەڵك) ڕایگەیاند، ئەو شەپۆلەی ناوچەكانی هەرێم دەگرێتەوە بە دوو قۆناغ دەبێت، قۆناغی یه‌كه‌م له به‌ره‌به‌یانی سبه‌ی یه‌ك شه‌مه ده‌ستپێده‌كات و كاریگه‌ری به‌سه‌ر سنوری پارێزگای دهۆك و ئیداره‌ی سۆران و به‌شێكی هه‌ولێر زیاتر ده‌بێت و ناوچه‌كانی دیكه ئاسمان به‌گشتی هه‌وری ته‌واو بۆ نیمچه هه‌وری ده‌ێت و له‌دره‌نگانیكی شه‌وی یه‌ك شهممه كۆتای به‌م قۆناغه دێت.
ڕاشیگەیاند، به‌ره‌به‌یانی دوو شهممه 2023/11/27 كاریگه‌ری قۆناغی دووه‌م ده‌ستپێده‌كات، كه‌شه‌پۆلێكی به‌رفراوانه و سه‌رجه‌م ناوچه‌كانی كوردستان ده‌گرێته‌وه به‌ڕێژه‌ی جیاجیا باران ده‌بارێت.
وتیشی، “پێشبینیم وایه زۆرترین بڕی بارانبارین له‌سنوری بارزان و سۆران و هه‌ڵه‌بجه و ناوچه شاخاوییه‌كانی دهۆك ببارێت، كه هه‌ندێ كات ئه‌گه‌ری لێزمه باران هه‌یه و ئه‌گه‌ری لافاو له دۆڵه‌كانیش هه‌یه”.
ئاماژەی بەوەشكرد، له‌گه‌ڵ هاتنی ئه‌م بارانبارینه بارسته هه‌وایه‌كی ساردیش تێكه‌ڵ به‌م شه‌پۆله ده‌بێت و هه‌روه‌ها به‌فرێكی زۆر له باكوری كوردستانیش ده‌بارێت و پێشبینی ده‌كه‌م به‌فر له‌ده‌ڤه‌ری باڵه‌كایه‌تی و هه‌لگورد و كۆره‌ك و سه‌فینیش ببارێت له‌گه‌ڵ زۆزك و هه‌ندرێنیش.
ئەو شارەزایەی كەشناسی پێشبینی ئەوە دەكات، “پله‌كانی گه‌رما به‌رێژه‌ی 4 پله نزم بێته‌وه و كه‌شێكی سارد و زستانی هه‌رێمی كوردستان بگرێته‌وه و هه‌ندێ جار و به‌تایبه‌ت ڕۆژی دوو شهممه ئه‌گه‌ری چالاكبونی با هه‌یه به‌ڕێژه‌ی 26 بۆ30 كم له كاتژمێرێكدا و دروستبوونی هه‌وره تریشقه له‌چه‌ند ناوچه‌یه‌كی جیاوازی گه‌رمیان و هه‌ڵه‌بجه”.
ڕوونیشی كردەوە، ئه‌م شه‌پۆله بارانبارینه تا دره‌نگانی شه‌وی دوو شهممه به‌رده‌وامه و پاشان كۆتایی پێدێت و بۆماوه‌یه‌ك كه‌ش و هه‌وا ئاسایی ده‌بێته‌وه.
